KRALENDIJK – Akusado Richard C. a presentá dilanti hues G. Edelenbos, despues ku ya a trata parti di e kaso aña pasa. Hues a bis’é ku el a deklará ku el a tira den laira ku un arma di kandela. Akusado Richard C. a bisa hues ku e relashon ku reclasering ta hopi bon i ta yuda ku su persona ta funshoná i sinti mihó. Richard: ”Mi ta yuda un persona ku ta las bou di awa i ta siña diferente kos awor komo ayudante di e persona ku ta las. Mi no tin amigu, sino solamente konosí. Mi ta hasi tur esfuerso pa tur kos bai bon sin niun problema. Pa e motibu aki mi ke haña un chèns pa mi kontinuá korektamente den komunidat,” akusado Richard a konta hues. Hues a menshoná ku tin petishon di parti di reclasering pa dunabo kastigu parsialmente kondishonal. Fiskal a pidi 20 luna inkondishonal kastigu di prison, hues a bisa e akusado. 

Abogado E. Winkel a defendé su kliente bisando ku su kliente ta sigui regla di reclasering hopi korekto. “Ta notabel ku despues ku el a sali for di prizòn. e ta bai hopi bon i ta dispuesto pa kambia su manera di biba. Bai bèk prizòn lo no yuda pa e ta riba e bon kaminda. Mi ta deseá pa e haña dispensashon,” abogado Winkel a bisa den defensa di su kliente. Hues a finalisá e kaso i a bisa: ”Bo tabata den  posishon di arma di kandela. Mi ta komprondé e demanda di fiskal. Mi a lagabo den libertat pa wak kon ta bai i bo a proba ku bo por komportábo bon. Bo no mester regresá prizòn. Mi ta kondenábo na un kastigu di prizòn di 517 dia kondishonal. Si algu pasa denter di 3 aña, bo mester kòrda ku ya tin un kastigu di prizòn kologá riba bo. Mester sigui guia di reclasering,” hues a sera e kaso bisando.

Share This
error: Content is protected !!