KRALENDIJK – Aktualmente Sindikato ABVO Boneiru ta tratando na haña datonan korekto di tur miembro registrá. Esaki ta den kuadro pa di awó i den futuro por tin un kontakto direkto ku kada miembro.

Durante di repartishon di agènda nobo di aña 2020 pa miembronan, a bin konstatá ku riba lista di registrashon no ta tur dato ta kuadra. Esaki sea, e miembro a yena por ehèmpel departamentu sin yena ta kua afdeling. Esaki a trese kuné ku entre otro tin bastante miembro ku ainda no a risibí nan agènda.

Un otro motibu ta ku na momentu ku tin kualke aktividat, ABVO no por alkansá tur su miembronan dirèkt i pa tal motibu mester pasa i saka aviso na radio i den korant. Esaki tampoko no ta práktiko debí ku no ta tur miembro ta skucha radio i/òf lesa korant.

Pa miembronan ku no a risibí nan agènda ainda pa tuma kontakto ku sr. Robert Sances (presidente), sra. Joanny Trinidad (sekretaria) òf sra. Betty Martis (kolaboradó).

ABVO ke hasi un yamada pa por fabor manda datonan di nobo i korekto pa por aktualisá lista di miembresia.

Por hasi esaki via app na number di telefòn 522-3099 òf via mail na robertsances@gmail.com. Ta rekerí den e kaso aki yena e departamentu i afdeling korekto, un adrès di email i si ta deseabel un number di telefòn.

Di e manera aki nos por aktualisá e lista di miembresia, pero tambe kuminsá manda nos boletinnan informativo na tur nos miembronan.

ABVO ta sigui krese na miembresia i ta trahando duru na adelanto di su miembronan.

Share This
error: Content is protected !!