KRALENDIJK – Lider di frakshon di partido MPB, Daisy Coffie, tin lunanan kaba ku e no por asistí na reunionnan di Konseho Insular. E ta risibiendo atenshon médiko konstantemente tantu aki na Boneiru komo na Hulanda. 

Ta konosí ku Daisy Coffie ta konfrontando problema serio ku su salú. Esaki ta pone ku e mester bai trankil, ademas mester biaha pa eksterior pa tempu largu pa sigui tratamentu. Sinembargo ketu bai e ta miembro di Konseho Insular. E lo keda okupá e funshon aki tambe. 

“E ta fastioso. Mi ta bou di tratamentu médiko pa tempu largu i enbèrdat no ta mira mi kara na reunionnan. Pero esaki no ke men ku mi no ta funshoná komo miembro di Konseho Insular. Al kontrario, Mi ta sigui tur kos, lesa tur dokumento ku ta yega Konseho Insular i di mes mi ta duna guia na nos frakshon”, Daisy Coffie a deklará. 

Coffie a splika ku awendia, den e mundu digital ku tin, ta hopi mas fásil pa komuniká i konsultá ku su frakshon i su partido riba tereno di gobernashon. 

Tabatin rumornan persistente ku MPB tabatin pensá pa kambia Daisy Coffie pa uno otro persona, pero Coffie a duna di konosé bon kla ku e ta sigui komo miembro di Konseho Insular te asina leu ku su salú ta pèrmití.

Share This
error: Content is protected !!