Kriterionan pa ta un nominado pa POTY :

  • E persona mester ta bibá na Boneiru.
  • E mester tin boluntat i habilidat pa traha ku mucha.
  • E mester tin un aktitut sumamente positivo.
  • Su meta no mester tin nada komersial.
  • E aktividat mester ta duradero i mester tin un toke sosial, kultural i edukativo.

Dia 1 di febrüari último Bonaire Lions Club a kumpli 58 aña di eksistensia. Durante di e selebrashon presidente Edelmira Carolina a hasi un donashon na dirigente di Formashon Musikal Krioyo.

Bonaire Lions Club a eligí tambe e POTY (Person Of The Year) di aña 2019. Ta un proyekto ku Bonaire Lions Club ta hasiendo ya pa 30 aña i ta un homenahe anual na un hende den nos komunidat ku a sobresalí den su trabounan boluntario pa sea nos hóbennan óf grandinan. E POTY ta Francel Celestijn ku ta hasi trabounan boluntario riba tereno di hóben. 

Un persona ku pa basta tempu kaba ta hopi aktivo riba tereno di formashon musikal di hóbennan. Semper e tabatin interes pa lanta un agrupashon musikal krioyo ku ta konsistí di solamente hóben. Asina el a lanta e agrupashon Formashon Musikal Krioyo ku ta kosechando hopi éksito.

PERSON OF THE YEAR (POTY) 2019 pa Bonaire Lions Club

Francel Celestijn (2 di nov. 1962 -Boneiru) semper a traha komo boluntario ku hóbennan riba tereno musikal.

Den pasado diferente músiko aktual a pasa serka Francel entre otro: Dwight Leoneta, Yairo Everts, Raul Piar, Stròngòlò i asina hopi mas. 

Pa 2 aña siguí den aña ‘90 Francel a organisá Festival di tumba hubenil. Tambe Francel a partisipá ku su hóbennan na Festival di tumba di Antia, kaminda Boneiru a bai ku e título máksimo. Den aña 2015 el a kuminsá ku un banda musikal Krioyo, ku ta hiba e nòmber di Formashon Musikal Krioyo, mihó konosí komo FMK.

Semper Francel tabata biba ku su soño pa forma un agrupashon musikal kultural ku solamente nos hóbennan, pa asina e por pasa su konosementu musikal over pa e hóbennan.

El a kuminsá ku 2 hóben i a sigui yuda e hóbennan aki boluntariamente, a bini tambe algun hóben mas aserka ku kier a siguí desaroyá nan mes tantu riba kuarta i algun instrumènt rítmiko. Ku e hóbennan akí el a disidí di forma un agrupashon musikal i a kuminsá ku e parti di práktika den grupo ku e hóbennan na su kas mes. E práktikanan di e agrupashon a kuminsá den fin luna di mart di e aña 2015 i e promé presentashon tabata den e festival di kanto krioyo hubenil di e mes un aña ei. Mirando kon e banda aki a presentá, FMK a haña un invitashon pa partisipá den luna di òktober na Kòrsou durante un festival di músika pa antia.

Den aña 2016 FMK a bai ku e premio máksimo i 2da finalista durante e festival kanto Krioyo hubenil. Tambe FMK a presentá 2 biaha na Hulanda (2017 I 2019), dia di Rincon na Tilburg. Na aña 2016 FMK a hasi presentashon na Kòrsou, riba dia di Himno i bandera. FMK for di ougùstùs 2015 ta un Fundashon i  tur trabou ta sososdé dor di boluntario, meskos ku Francel . For di aña 2016 tur aña FMK a keda partisipá den Kanto Krioyo hubenil i tur aña FMK ta bai ku diferente premio. Na aña 2019 FMK a bolbe bai ku e premio máksimo durante di Kanto Krioyo hubenil .

Aktualmente Francel ta dunando lès di bas i kuarta na kas i ketu bai ta sigui buska talentonan hóben pa asina por sigui ku nan desaroyo.


Share This
error: Content is protected !!