KRALENDIJK – Hopi kriadó di kabritu ta malkontentu kon ladron ta kue nan kabritu. Hende ta hòrta kabritu, polis ta topa nan i no por aktua. Un suidadano di Rincon a aserka Live 99.9 FM i el a ekspresá e problema di ladronisia di kabritu. “Algun dia pasá polis a topa algun persona ku tabatin kabritu den nan poder, ku tur probabilidat bestia hòrta. A laga e personanan den libertat debí na falta di prueba. Tur bia e mes un situashon, esta ta bisa no tin prueba ku e karni di kabritu ta di kabritu hòrta si òf no,” e suidadano a konta. El a sigui bisa ”Si un persona no tin kunuku òf no ta kria kabritu, kon e tin karni kabritu fresku ta kore bai bin kuné den outo? Ku regularidat e kos aki ta sosodé pa no papia mes, loke ta sosodé den luna di aprel yegando dia di Rincon. Nos mes hendenan di bario ta kue kabritu den e kunukunan den serkania di e bario. Tin informashon ta ken ta esnan ku ta hòrta kabritu, sinembargo nada ta sosodé, ”e persona a konta.   

“Mester kuminsá pasa kaminda ta kushiná kabritu , i pidi e restorant un prueba unda el a kumpra e karni. Si esaki no sosodé e kriadó di kabritu ta keda sufri. Sèmper esun ku ta bende kabritu mas barata, ta karni di kabritu  hòrtá, pasobra e no tin niun gastu i molèster ku e kabritu.”

Share This
error: Content is protected !!