KRALENDIJK – Un eksperensia di loke a sosodé, ku a kuminsá for di 2 di febrüari i terminá djadumingu mardugá den Stadion Antonio Trinidad. Miéntras reportero Fittipaldi Pietersz tabata kubri e aktividat di esnan kende a bai inskribí pa partisipá den festival di tumba 2020, el a tuma nota di un situashon i rápido a saka un potrèt. Sharlon “Galan” Melaan, tata di Luigino Molina tabata na e área kaminda e mantel i e korona di e Rei di tumba 2020 tabata poné. El a mishi kuné i Fittipaldi a bis’é, no mishi ku kos ku no ta dibo. El a kontestá rápido sin pensa: E kos aki ta dimi òf di nos. Tabata nèt momentu ku e yu a kaba inskribí su tumba.      

Fittipaldi: ”Mi ta kòrda ku mi a mira un otro persona mishi ku e mantel i korona promé òf despues ku nan a inskribí pa festival di tumba. Despues ku Galan a kontestámi el a aserkámi i nos a kombersá hopi e anochi. Djadumingu mardugá momentu ku diputado James Kroon a bisti Luigino e korona, mi a kòrda loke a sosodé. Mi a buska Galan pa mi puntr’é si e ta kòrda loke nos a papia, sinembargo e tabata riba esenario pa duna su yu pabien ku e korona komo Rei di tumba”. Simplemente for di inskripshon Galan, tata di Luigino, tabata sigur ku su yu ta bai ku e korona di Rei di tumba 2020.

Share This
error: Content is protected !!