KRALENDIJK – Djasabra awor, 15 di febrüari 2020, e komishon di aktividat, KOMAK, di Union di Penshonado pa Adelanto i Hustisia, UPAH, ta organisá su promé Mainta Sosial di e aña akí. Esaki ta kombiná ku un charla informativo. E tema di e mainta sosial akí ta: ‘Estilo di bida saludabel, relashoná ku malesanan vaskular i di kurason i diabétis. E mainta sosial ta na Sala Imelda di misa katóliko Labirgen di Coromoto di Antriol. E ta tuma lugá di 9or pa 11or di mainta.

E charla ta na enkargo di dietista sra. Lucinda van der Wardt. Sra. Van der Wardt lo duna un splikashon tokante di e tópiko, kompañá pa un presentashon visual den PowerPoint. E informashon ta na papiamentu.

E charla ta pa tur miembro di UPAH, pero tambe otro interesadonan ta bonbiní. UPAH ta invitá partikularmente personanan ku ta a traha pa gobièrnu i ku ta kobrando penshun pa medio di Penshunfonds Caribisch Nederland (PCN), ku ainda no a bira miembro di UPAH, pa pasa e mainta akí i tuma informashon tokante e benefisionan di ta miembro di UPAH.

Manera kustumber lo tin kòfi, te i algu pa tene e stoma. Entrada ta grátis.

Share This
error: Content is protected !!