KRALENDIJK — Akusado Renzo C. e siman aki tabata den sala di korte relashoná ku kaso di robo i violensia. Hues Gruijters a puntra akusado entre otro su nòmber i el a nenga di aseptá i kontesta riba pregunta nan di hues.  

Durante 2019 na luna di yüni i novèmber el a kometé echonan kastigabel ariba menshoná.

Hues a papia ku akusado Renzo C. i a puntr’é kiko e ta pensa di loke a sosodé. Akusado a disidí di kuminsá papia i a menshoná: ”Si nan lo a dunami mi sèn, e kos lo no a bira un problema. Mi a kumpra un “Play Station” i e no tabata funshoná. Mi tabata ke mi sèn bèk i mi no a hañ’é, akusado a splika hues. Hues a bisa ku e hendenan a keda pa wak kiko a sosodé ku e aparato ku no ta funshoná, esaki pa medio di e kompania kaminda a kumpra e aparato. Akusado a bisa ku e komersiante tabata na altura ku e ta bende kos ku no ta funshoná. “A keda birami pa dunami mi sèn, p’esei mi a choke. Mi tabata huntu ku un amigu mas, i e hòmber di e lugá mester ta kontentu ku ta asina e kos a bai, ku no tabata pihó. E hòmber di e lugá a pone 25 dòler p’ami, loke no tabata e suma kompletu i polis nan ku a presentá na e sitio a kue e sèn, esta 25 dòler i no a dunami mas. Pues mi ta konsiderá ku polis a hòrta e sèn. Total tabata 50 dòler ku mi a paga e hòmber, akusado Renzo a splika. Hues a bis’é ku e mester a atendé e kaso di otro manera i no a bai bringa ku e persona. “Bo mester a bai polis entre otro”. Akusado a bisa hues: ”Loke mester a sosodé mi mester a dal e polisnan ku a kue mi sèn”.

Hues a bis’é ku e por bai prison pa loke a sosodé, i akusado a bisa no ta nada, pasobra un dia e lo ta den libertat bèk. Akusado a keda bisa hues loke ta sosodé ta ’Bullshit’. “Ami sa dikon mi a rabia pasobra mi a pèrdè mi sèn. No tin motibu pa serami, mi ta rabia pa mi derecho,” akusado a bisa hues demostrando hopi rabia den sala di korte.  

Fiskal M. Boheur a trese den su rekisitorio entre otro ku e tin gana di sa kon e kaso lo terminá. Akusado a rabia i a benta stul den sala di korte Henk W. Welvaart i bandoná sala di korte. A yama polis i nan a presentá i a purba trankilisá Renzo. El a disidí ku e ta drenta sala di korte pa kontinuá ku tratamentu di su kaso. Fiskal a kontinuá i a menshoná ku loke a sosodé ta algu kastigabel. 1 aña kondishonal reclassering i 2 aña di prueba.

Abogado Anthony Nicolaas a defendé su kliente i el a bisa ku ta di 2 bes e ta defendé su kliente. E tin problema kon e ta ekspresá su malkontentu. E ta yòn i ta bon pa nos yud’é pa e tin un bida bon. E ta bou di tratamentu i ta bon pa tene kuenta i yud’é, abogado Anthony a menshoná entre otro den defensa di su kliente. Hues a pidi Renzo kiko ta su último palabra el a menshoná e no tin nada mas pa bisa. Hues a sera e kaso i a pidi un kastigu di prison kondishonal di 1 aña i sigui guia di reclassering. Renzo a sali for di sala di korte hopi desgustá. 

Share This
error: Content is protected !!