Willemstad – Apesar di pasonan signifikativo ku Kòrsou ya a dal pa pone su presupuesto na òrdu, aña 2019 tambe lo sera ku un défisit. Kolegio di supervishon finansiero Kòrsou i Sint Maarten (Cft) ta konstatá ku te ku awor a pone muchu énfasis riba subimentu di entrada na lugá di redukshon di gastu. Sigur den kombinashon ku reforma ekonómiko, redukshon di gastu por yuda hisa kresementu ekonómiko i mehorá balansa di pago. Ainda tin un reto konsiderabel pa aña 2020. Algun ehèmpel: e gastunan operashonal di e hòspital nobo ta 81 mion florin mas haltu ku tabata e kaso pa e hòspital bieu Sehos, sierto entradanan di impuesto ta kalkulá demasiado haltu i tambe mester tene kuenta ku CBCS i RdK lo no paga e dividendonan presupuestá. Ademas medidanan manera e liña sero (‘nullijn’) pa ámtenarnan lo tin retraso.

Segun e instrukshon ku Konseho di Minister di Reino a duna Kòrsou dia 12 di yüli 2019, e pais mester kompensá e défisitnan di 2017 i 2018 pa medio di e surplusnan riba e servisio ordinario di añanan 2020 te ku 2022. Pa 2017 un défisit riba e servisio ordinario di 116,8 mion florin a keda realisá. E konsepto di kuenta anual di 2018 ta sera ku un saldo negativo di 58,5 mion florin riba e servisio ordinario. Den e próksimo simannan kòntròl di e kuenta annual lo indiká si e défisit aki lo sigui oumentá. Pa awor aki e défisitnan di añanan 2017 i 2018 ta yega na e montante total di 175 mion florin. Miéntras tantu a resultá ku 2019 tambe lo sera ku un défisit. Lo mester kompensá esaki tambe.

CMC i kuido

Tantu e hòspital nobo Curaçao Medical Center (CMC) komo kuido di salú en general ta forma riesgo finansiero pa presupuesto di Kòrsou: riba término kòrtiku e riesgo aki ta enserá entre otro e gastunan di eksplotashon mas haltu pa e hòspital i pa kuido. Den ougùstùs di aña pasá Gobièrnu a entregá un petishon serka Cft pa un fiansa adishonal di 200 mion florin máksimo pa e hòspital nobo. Ta di importansia krusial pa Kòrsou indiká na kua manera lo kompensá e gastunan operashonal mas haltu aki pa medio di ahustenan adishonal den kuido den e hòspital. Lo evaluá esaki tambe den e second opinion di SOAB, i ta krusial pa esaki – ku a keda primintí pa promé ku 1 di desèmber 2018 – bira disponibel awor si den un forma rápido.

Riesgo finansiero

Cft ta identifiká un gran kantidat di desaroyo ku por ta di influensia riba presupuesto di pais. Un di nan ta e solushon ku ta buskando pa e problema di Girobank. Banda di esei, ainda no ta kompletamente kla kiko lo ta e konsekuensianan di e kooperashon planeá entre Refineria di Kòrsou i e grupo di Klesch, ku tin interes di kontinuá ku e aktividatnan di refinashon. Konsekuentemente pa awor aki no ta kla ta kua efekto e koperashon aki lo tin riba ekonomia i presupuesto di Kòrsou.

Presupuesto 2020

E medidanan menshoná den presupuesto di 2020 ta haña retraso i ya a bira evidente ku lo mester ahustá e presupuesto aki. E dividendonan pa CBCS i Rdk ku tur probabilidat lo no drenta, e medida di ‘nullijn’ pa ámtenarnan pa un parti lo tin retraso i lo mester redusí sierto kalkulashon di impuesto. Kòrsou a komprometé su mes pa riba término korto entregá un amienda di presupuesto pa por kumpli ku e kambionan aki. Cft a konsehá enfátikamente pa redusí e gastunan.

Maneho finansiero

E progreso den ehekushon di e Roadmap, kual lo mester kondusí na un deklarashon aprobatorio di akountent pa e kuenta anual di 2021, ta limitá. Ta parse ku no tin un bista general riba e totalidat, ni guia for di un punto sentral. Pa un sierto kantidat di proyekto a pidi asistensia tékniko, i ounke ku e Akuerdo idi Kresementu ta brinda posibilidat pa yega na asistensia rekerí, tòg ainda esaki no a keda realisá.

Cft a bishitá Kòrsou di 10 te ku 12 di febrüari i a hiba kòmbersashon ku Gobernadó, Minister di Finansa, Minister di Salubridat Públiko, Medio Ambiente i Naturalesa, Konseho di Minister, e Komishon Finansiero di Parlamento, Stichting Overheidsaccountantsbureau (SOAB), Curaçao Medical Center (CMC), Wardakosta, Konseho Sosial Ekonómiko (SER), Banko di Seguro Sosial (SVB) i Banko Sentral di Kòrsou i Sint Maarten (CBCS).

Pictures by © Berber van Beek https://www.facebook.com/studiorootzphotography/ or www.studiorootz.com
Share This
error: Content is protected !!