KRALENDIJK – No ta bini persiguishon penal den e kaso di kandela ku a surgi aña pasá jüli na kas di famia Dorothea situá na Kaya Karkó den Nikiboko. Esaki bosero di Ministerio Públiko BES, Roderick Gouverneur a deklará.

Tabata na luna di jüli aña pasá ku den mardugá a surgi un kandela den kamber pafó di e kas. Tin miembro di e famia a resultá gravemente heridá. Un di e víktimanan a fayesé na Colombia, despues ku a hib’é pa tratamentu médiko. 

Tabata sirkulá basta rumor tokante e kandela aki, entre otro ku lo por tabata un kandela sendé intenshonalmente i ku lo a sigui persiguishon penal. Mientrastantu mas di 6 luna a pasa kaba, sin ku a sigui ningun akshon di parti polis i Ministerio Públiko. “E kaso di jüli tabata unu serio. Lamentablemente durante rekonstrukshon no por a determiná kiko tabata e kousa eksakto di e insendio”, bosero di Ministerio Públiko BES, Roderick Gouverneur, a deklará.

Share This
error: Content is protected !!