KRALENDIJK – Akusado Sheannel I. a presentá dilanti hues pa responsabilisá loke a sosodé 30 di Novèmber 2019. Akusado a konta ku bèrdat el a hasi loke a sosodé, debí ku e tata di kriansa a dal e mama. “Mi a kuminsá bringa ku mi tata di kriansa i e kos a yega asina leu ku mi a kue machete pe,” Sheannel a konta.  

El a sigui bisa: ”Mi tata di kriansa a kibra glas di outo i tabata hopi agresivo. E ta un persona ku ta bira agresivo, i pa e motibu aki mi a bringa kuné i kue machete pe. Mi ke a simplemente mustra ku tin basta di abusá di mi mama. Mi no tabatin intenshon pa dal e hòmber ku e machete. Si el a tende, e kos lo no a yega asina leu,” akusado a menshoná. Hues Gruijters a bis’é ku un bisiña a bisa e akusado pa stòp sinembargo e no a tende i a kontinuá. “Promé bia ku bo ta kai den man di hustisia,” hues a bisa e akusado.” Akusado a bisa e no tabatin deseo pa kòrta e tata di kriansa. “Mi konosé mi tata di kriansa gran parti di mi bida. Sèmper el a yudami di kurason. Mi a dal e ku machete, pasobra momentu ku mi a kue e machete, a bin den mi mente ku el a bati mi mama ku kuchú,” akusado a konta. Un persona di Krusada tabata presente i el a konta e motibu ku Sheannel ta na e instituto pa nan yud’é i pa e ta stabil bèk den komunidat. Akusado a sinta 10 dia den prison.

Fiskal a trese su rekisitorio i a konta loke a sosodé.  E problema a kuminsá entre tata di kriansa i e yu di kriansa Sheannel. Despues Sheannel a kue machete i aktua. E ta algu kastigabel. 2 luna kondishonal i no mester bai prison. Trabou pa komunidat di 80 ora i sigui guia di reclasering, 2 aña di prueba, fiskal a menshoná.

Abogado Marga van Lieshout a defendé su kliente i a bisa ku e tata di kriansa a presentá ku diferente kos ku e ta bai hasi loke a pone ku Sheannel a kue machete i a dal e tata di kriansa kuné, abogado van Lieshout a bisa.

Lastu palabra a di akusado tabata ku 80 ora di trabou pa komunidat ta difísil pa e hasi, debí ku e ta traha práktikamente tur dia, akusado a menshoná.

Hues a sera e kaso i a bisa loke a sosodé ta algu kastigabel.  2 luna kastigu di prison kondishonal, 2 aña di prueba i sigui guia di reclasering. Mester kumpli ku 80 ora di trabou pa komunidat, hues Gruijters a bisa na final di e kaso.   

Share This
error: Content is protected !!