Kralendijk – Resientemente por a tuma nota den Reunion di Konseho Insular, tratando e echo ku riba inisiativa di Diputado Tjin Asjoe Kolegio Ehekutivo a kontratá kontribudor di MPB sr. Oscar Castillo pa duna servisio paga na Gobièrnu di Bonaire, kon Diputado TjinAsjoe ta gaña den pleno sala di reunion di Konseho Insular pa tapa su fechorianan.

Resientemente Kolegio Ehekutivo a kontratá Sr. Castillo pa duna treinen na empleadonan públiko di Bonaire pa un suma di 66 mil dòler di sèn di Pueblo. Ta un sekreto públiko ku desde 2015 Sr. Castillo a duna servisio gratuitamente na e Partido Polítiko MPB i awor tin e aparensia ku ta Pueblo di Bonaire mester paga e kuenta habrí aki tumando nota ku a otorgá e tarea na Sr. Castillo sin tene un destaho públiko pa esaki.

Awor na lugá di duna kuenta i rason riba e desishon remarkabel di Kolegio Ehekutivo aki, Diputado Tjin-Asjoe a subi un kabai di trese mentira i trata na involukrá otro persona den su fechoria. Asina Tjin-Asjoe ta pretendé ku Partido Demokrat i su frakshon tambe a tuma servisio serka Oscar Castillo. Un mentira ku tur hende na Bonaire sa ku no ta bèrdat.

Lobby pa Drenta MPB

‘Riba invitashon di eks Kolega diputado Den Heyer i e propio Tjin-Asjoe, mi a partisipá na un treinen ku MPB tabata organisá, debí ku mi a traha 15 luna largu ku Kolega Den Heyer den Kolegio Ehekutivo.’, sigun Hellburg-Makaai. Den Heyer i Tjin-Asjoe tabata intentando pa konvensé mi persona pa integrá den nan organisashon Polítiko MPB i a pasa tur radio plak mi persona na MPB, tresiendo hopi konfushon i konsternashon den peublo pa ku mi persona. Mi tabata diputado independiente, sin ta miembro di/ni afiliá na niun partido polítiko.

Skohe pa Demokrat

Despues di un kombersashon i un treinen, mi a konfirmá ku mi kas polítiko ta DEMOKRAT. E motibu pa esaki ta fásil. E prinsipionan, konosementu i abilidat ku tin den DEMOKRAT, ta lokual ku Bonaire mester i ku ta kuadra ku mi persona. ‘Mi a traha 15 luna komo diputado ku MPB i 3 luna ku DEMOKRAT. Den e tres lunanan ku DEMOKRAT mi persona i nos kolegio a logra muchu mas ku tur e lunanan ku MPB, paso mi a haña e espasio pa traha. ‘Tanten MPB ta papia nechi, ku DEMOKRAT i kolega Abraham, mi a eksperensia direktamente e diferensia kon Goberná na un manera efektivo, transparente i desidido na interes di Pueblo.’, konforme Rolanda Hellburg-Makaai. Mi tin ku bisa ku tur dia di nobo mi ta gradisi e Kreador pa a guia mi pa tuma e desishon pa a bai ku Partido Demokrat. Un desishon ku te awe mi no ta lamenta pero a kontrario e ta un bendishon.

Tira Piedra, Skonde Man

Den siman ku a pasa mi tabata den eksterior pa mi trabou diario di Duanero, i no por tabata presente den e reunion di Konseho Insular. Den mi ousensia, diputado Tjin Asjoe ta trese mentira den Konseho Insular, hinkando mi nòmber den su boka, sabiendo ku mi no tei presente pa kontradesí su mentira. Mi ta haña esaki un akto di kobardia i ta lamenta ku Tjin-Asjoe a skohe politika riba un amistad di hopi tempu dañando esaki sakando un mentira sin base ku fasilmente por ser komproba.

Ku Tjin-Asjoe a gaña riba mi persona no ta e krimen ei so ela komete pero ela bolbe demostra ku e ta un persona inkonfiabel i un peliger pa gobernashon. Mi ta hañ’e tristu ku un polítiko ta baha e nivel di e funshon di diputado pasó e no por splika kon su persona a privilegiá un kontribudor di Partido ku sèn di Pueblo. Enbes di bin dilanti i asepta su eror ta skohe manera semper e tin kustumber di hasi buska otro ku no tin ni arte ni parti den su fechoria, pa tapa su eror. Na papiamentu tin un dicho ku ta bisa ku Porko gusta buska muraya limpi pa frega su kurpa. Mi konseho na sr. Tjin Asjoe ta pa e buska otro muraya pa frega su kurpa na dje.

Share This
error: Content is protected !!