SUPUESTO MENER DI SKOL TA MISHI KU MUCHA DEN KLAS

KRALENDIJK – Un mayor desesperá a tuma kontakto ku Radio Live 99.9 FM pa papia di algu ku a sosodé. Ta trata di un kaso kaminda un supuesto mener di skol a pasa man riba yu di e señora.
E yu di e señora ta bai SGB sekshon PRO. El a konta ku e yu a bis’é ku un mener a pasa man riba su bèl di pia i a klap e riba su chanchan. E mayor a konta ku ta trata di un supuesto mener di skol na PRO. Supuesto mener debí ku no ta trata di un mener, sino un persona no kalifiká (mekániko) a risibí funshon pa duna lès na skol komo dosente. E mener a pasa man karisi’é i den un otro klas e mes un mener a klap e mucha riba su chanchan. Mama di e mucha a papia ku e mener di skol, i el a splika ku el a klap e mucha pasobra e tabata na un sitio ku ta prohibí pa e muchanan bai sierto momentu. Un otro mucha di e skol a konta ku ta trata di 3 mucha ku e mener a fula òf mishi kuné na skol. Pues nan mester kit’é for di skol. E mama a sigui konta ku a papia ku e direktor di unidat di PRO kende ta Eric i el a bisa e mama di e mucha ku e no ke tuma parti pa niun hende i no ke puntra otro muchanan di klas kiko a sosodé, pa e kos no eskalá.
Mama di e yu a konta ku e mener a pidi tantu e mama komo e yu sòri loke a sosodé. E mama a bisa bon kla na e skol, ku e no ta laga e kos keda te aki. “Mi a bai polis pa investigá kiko ta sosodé na e skol, i e yu lo no kontinuá lès serka e mener,” e mama a konta. Pues ya for di siman pasá e yu ta bai skol i no por ta den serkania di e mener.

Live 99.9 FM a komprondé ku na SGB tin diferente persona ku no ta mener di skol ku ta duna lès supuestamente komo dosente. Esaki ta e resultado e mama a konta. “E tal mener ta mekániko. E no tin niun konosementu pa duna mucha lès. Pues un hende ku no sa nada, ta siña mi yu ku no sa nada kiko e mester hasi. Ta manera bestia ta duna bestia lès. Otro kos, ta notabel ku no tin niun mucha hulandes ta haña lès na PRO.
Nan ke tapa solo ku 1 dede. Awor nan a bisa ta bai manda e yu EOZ relashoná ku loke a sosodé,” e mama a konta i ta hopi rabia loke ta sosodé último tempu na SGB.
E mama a bai polis pa duna keho di loke a sosodé.

Share This
error: Content is protected !!