KRALENDIJK – Relashoná ku loke Radio Live 99.9 FM a publiká resientemente tokante loke a sosodé na SGB, Frans van Efferink direktor general di e skol a reakshoná riba e artíkulo. Ta trata di e kaso kaminda un dosente asistente a mishi ku un òf mas alumno. E dosente aki lo a pasa man na bèl di e mucha i a klap’e riba su chanchan. E mama ku a bin tende di su yu kiko a pasa, mesora a aserká e dosente asistente kende a bisa ku el a klap e alumno paso e tabata na un sitio ku ta prohibí pa muchanan ta na sierto momentu. E dosente a pidi tantu e alumno komo su mama despensa di loke a sosodé. Van Efferink:” Nos ta na altura di loke a keda publiká, i nos a sinta na mesa i papia ku mama di e alumno. Loke a sosodé ta inkorekto. SGB ta para pa siguridat pa e alumnonan i tin esaki haltu den su bandera. Loke a sosodé ta ku e dosente asistente di SLP a tek e alumno na su bèl i riba su atras. Nos no ta tolerá tipo di aktonan manera loke a sosodé. Van Efferink a indiká ku e dosente asistente enbolbi tabata den su periodo di prueba i SGB a tuma e desishon pa tèrminá relashon di trabou inmediato kuné. Skol ta skohe pa un relashon pedagógiko entre edukadó i alumno. SGB ta lamenta pues loke a sosodé na e skol i e mama por ta sigur ku algu asina lo no ripití. Nos tin rèspèt pa tur mayor i ta komprondé bon kla kiko e mama a ekspresá di loke a sosodé. Pa straño ku e ta zona, mi ta di akuerdo ku e mama a bai polis pa loke a sosodé na skol pa investigashon wòrdu hasí di un tèrsera partido,” direktor di SGB van Efferink a menshoná. El a mustra bon kla ku e skol no ta para pa tipo di aktitut asina, esta e forma kon e asistente a aktua. Den bon kombersashon ku e mama, e lo sòru pa e yu por sigui su karera na e skol sin miedu.

Share This
error: Content is protected !!