KRALENDIJK – Djamars último a tuma lugá un enkuentro ku prensa relashoná ku e di 18 Walk-A-Thon organisá pa Special Olympics Bonaire. Tres persona a dirigí palabra elaborando tokante e aktividat. Arlene Engelhardt ‘National director di Special Olympics Bonaire’, Earon Rosario ‘Head Coach’ i Grace Winklaar di Digicel. ‘Special Olympics Bonaire’ ta pa mucha i adulto ku defisiensia físiko intelektual ku ta partisipá na deporte nashonal i internashonal. ‘Special Olympics Bonaire’ ta un organisashon sin fondo. Pa yega na fondo ta organisá diferente aktividat. Un di e aktividatnan ku ta rekoudá fondo pa ‘Special Olympics Bonaire’ ya pa 18 aña ta e ‘Walk-A-Thon’. Ta trata di un kaminata ku un distansia di 30 kilometer kuminsando for di saliña na altura di kas di katibu i tèrminá na Rincon. Por partisipá tambe ku baiskel. E ruta di baiskel ta desviá un poko for di esnan ku ta kana. E ‘Walk-A-Thon’ ta dia 8 di mart 2020. Earon Rosario a menshoná ku no ta un obligashon pa esnan ku ta bai ku baiskel kore e ruta di 40 kilometer.Por bai e ruta di 30 kilometer manera e hendenan ku ta kana. Salida ta 5’or di mainta. Esnan ku mester di transporte pa kas di katibu mester ta presente 4’or di mardugá na Stadion di Playa. Tin diferente pòst durante e ruta pa tur partisipante te momentu ku nan yega na ‘Pasadia Kariño na Rincon’, Earon a menshoná. Despues a dirigí palabra Arlene Engelhardt: ‘Na diferente establesementu na Boneiru por kumpra karchi pa partisipá. Pa mas informashon di karchi por yama number di telefon: 795-4043, 781-0196 i 787-1571. Dia 6 di mart 5’or di atardi pa 7’or di anochi i dia 7 di mart 10’or di mainta te 4’or di atardi na ‘El Mundo’, ta hasi entregá di pakete pa tur partisipante. Último persona kende a dirigí palabra tabata Grace Winklaar di Digicel. El a menshoná entre otro ku ta un tremendo trabou loke e grupo ta hasi pa ‘Special Olympics bonaire’. “Nos di Digicel ta spònser ku amor. Esnan ku partisipá na e aktividat ta kontribuí pa e hendenan ku mas mester di nos yudansa. Digicel ta hasi un yamada na komunidat pa bin masal i partisipá na e aktividat,” Grace a tèrminá bisando.

Share This
error: Content is protected !!