KRALENDIJK – Kuerpo Polisial Karibe Hulandes durante un rueda di prensa a elaborá entre otro riba e sifranan di kriminalidat, ladronisia i aksidente den tráfiko. Gezaghèber Edison Rijna tabata presente formando parti di e tim di ‘Driehoek’ i el a menshoná ku e situashon ta bai den bon direkshon, sinembargo tin kos ku ta rekerí atenshon. “Aksidente di tráfiko a oumentá i ta spera ku introdukshon di lei nobo di tráfiko ta pone ku aksidentenan ta bira ménos. Ta notabel ku kiebro den kosnan relashoná ku turismo a oumentá, mes kos ta e parti di turista sambuyadó.” Despues a papia hefe di kuerpo polisial Jose Rosales i fiskal mayó Bote ter Steege kende a menshoná ku kasonan di krímen tin atenshon, sinembargo no por stòp nan di sosodé. Tin ménos kaso di droga ta bin dilanti, di esnan ku ta trata pa drenta e isla ku droga, sigur muchu ménos ku otro islanan. E parti di kontròl den tráfiko ta kontinuá sierto momentu spesífiko na sierto área ku ta duna resultado, nan a menshona. Diferente pregunta di parti di miembronan di prensa a keda hasi i entre otro nan a kontesta ku polis tin atenshon riba koredónan di dòmtrùk ku ta kore iresponsabel. Na luna di òktober 2020, 9 polis ta drenta servisio i por hasi mas kontròl riba kaya. Ta planiá pa kuminsá ku un klas di lès pa bira polis di 20 persona ku ta sosodé na Boneiru. Mester di algu mas ku 30 polis nobo pa e kuerpo ta stabil i por duna e servisio manera mester ta. Esaki tin di aber ku polisnan ku ta bai baha ku penshun i otro mester remplasá nan.  
Seguidamente a duna un presentashon kon e parti di kontròl riba alkohòl ta bai tuma lugá. Otro tema ku a duna un splikashon amplio di dje, ta e parti di glas skur di outo. 1 di mart 2020 polis ta kuminsá kontrolá vehíkulo ku glas skur ku ta ménos ku 70 porshento. Esei ta e situashon te na e momentu aki. Sinembargo tin kòmbersashonnan tumando lugá di parti di gobièrnu ku ta bai pone den e lei nobo di tráfiko 55 porshento.

Share This
error: Content is protected !!