KRALENDIJK – Awe mainta trempan alrededor di 3.25 di mardugá, a drenta notifikashon ku tin un kandela na altura di Kaya Industria. Brantwer ta duna di konosé ku no tabatin herido a konsekuensia di e kandela aki. E kuater depósitonan ku tabata konektá ku otro, siendo di diferente negoshi inkluyendo un garashi, a kima por kompleto.

Na e sitio brantwer a eskalá mesora pa un kandela grandi. Dor di akshon rápido di brantwer, e kandela a keda limitá te na e kuater depósitonan aki. Pa mas o ménos 5.15 or di mardugá e kandela tabata bou di kontrol.

Ekspektativa ta ku ta kaba paga e kandela kompletu awe tardi. E temperatura haltu a pone e konstrukshon di metal di e depósitonan sak den otro. Pa e motibu aki algun parti di e dak a basha abou. P’esei ainda no ta seif pa brantwer drenta e edifisio. Pa kita e partinan grandi di e konstrukshon, mester usa un kran, di moda ku e bomberonan por drenta na un manera seif pa kaba paga e partinan ku ta kayente.

Den e partinan pabou di e kandela, e área di Playa Pariba, por tin molèster di holó i huma, partikularmente dor di tayernan ku a kima. Brantwer ta konsehá pa keda for di e huma.

Share This
error: Content is protected !!