KRALENDIJK – Djarason 12 di febrüari 2020, un hòmber di 67 aña a presentá dilanti hues den korte di promé instansia na Boneiru. Pa un periodo hopi largu e la hür un kamber ku dos venesolano ku ta kedando ilegal na Boneiru. E la gana plaka ku esaki. Segun Ministerio Públiko e sospechoso a hasi su mes kulpabel na trafikashon di hende. Si bo hasi bo mes kulpabel na e echo aki, ta nifiká ku e sospechoso a aktua kontra di e maneho di gobièrnu pa kombatí lokalidat na Boneiru. Estadia ilegal ta kousa daño na e komunidat Boneriano i na ekonomia. Trahadónan ilegal ta perkurá pa un konkurensia inhustu riba merkado laboral. Mayoria biaha nan ta trahadó barata ku ta pagá bou di sueldo mínimo. Nan no ta paga belasting ni primanan sosial. E merkado di labor lokal ku tambe por ehersé e mesun trabou, no ta haña trabou, òf ta obligá pa traha pa e sueldo mas abou. Fiskal a demandá un kastigu di trabou di 160 ora i un kastigu 6 luna kompletamente kondishonal ku un periodo di prueba di 3 aña. Mirando edat di e sospechoso i konsiderando ku nunka ántes e no tabata tin kontakto ku hustisia, hues a imponé un kastigu di prisòn kompletamente kondishonal di 4 luna ku un periodo di prueba di 3 aña. Si e hòmber bolbe faya durante e periodo di tres aña, e mester sinta su kastigu di 4 luna.

Share This
error: Content is protected !!