KRALENDIJK – “Show me your Blue” ta e kampaña di karnaval diseñá pa e grupo di guia (PR werkgroep) “Blue Destination” i algun partner ku ta entre otro; KVK, Cuba Company, OLB, STINAPA, It’s Rain Fishes, TELBO, WEB, BONHATA, TCB, Bonaire Logistics i SELIBON. E meta di e kampaña aki ta pa konsientisá karnavalistanan ku tepnan balioso durante nos marchananpa tene nos isla limpi, i alabes kon pa minimalisá uso di plèstik i e impakto di sushi durante nos karnaval. E kampaña ta diseñá pa un i tur; esta karnavalistanan den grupo di karnaval, stènt nan kantu di kaminda i tambe personanan ku no tin un stènt pero ku tòg ta bai wak karnaval. E kampaña ta pa durante e dos marcha grandinan; ku ta 22 di febrüari na Rincon i 23 di febrüari den Playa. Algun di e tepnan ta por ehèmpel pa karnavalistanan bai ku nan beker re-usabel òf usa kùp “compostable”, no usa richi di plèstik, bini ku bo bestèk i baki di kuminda re-usabel òf ku por resiklá i evitá na usa bakinan di “foam”, bai karnaval kubo mes djùg yena ku awa di kranchi pa bebe, usa krema di solo liber di “oxybenzone”.

Durante e dos dianan di karnaval aki lo chèk e gruponan i stèntnan kantu di kaminda pa midi i wak si nan a sigui nos tepnan. Na final di e temporada lo anunsiá kua grupo i tambe kua stènt tabata esnan mas sostenibel durante karnaval ku e oportunidat pa gana diferente premio. Lo saka pa kada un di e kategorianan; seya grupo di karnaval òf stènt tres ganadó kuminsando for di esnan ku tabata mas sostenibel. Pa e personanan kantu di kaminda ku no tin un stènt lo tin un “Blue team” durante di marcha ku un frame ku por saka potrèt ku ne. E portrètnan lo wòrdu pone riba e paginá di Facebook di “Blue destination” i e 2 portrètnan ku mas “like” lo gana un premio. Kièrmen seya kreativo pa atraé mas “like”!

Ban seya konsiente, gosa na midi i tene nos isla limpi.

Pa mas informashon tokante e kampaña aki por sigui e paginá di Facebook di “Bonaire Blue Destination”.

Share This
error: Content is protected !!