KRALENDIJK – Pueblo di Boneiru ta invitá pa asistí na e diferente aktividatnan durante Kuaresma komo preparashon pa selebrashon di Pasku di Resurekshon 2020.

Kuminsando ku e Santa Eukaristia riba djarason dia di Shinishi 26 di febrüari na:

Misa di Playa : 06:30 di mainta / 7or di ancohi

Misa di Antriol: 7or di mainta / 9or di mainta (na Ingles) / 7:30 di anochi

Misa di Rincon: 10or di mainta / 7or di anochi

E mensahe pa Kuaresma pa e aña aki ta pa nos rekonsiliá nos mes ku Dios (2 Kor. 5:20) i pa nos keda mira e brasanan habrí di Kristu Hesus krusifiká i laga bo bolbe keda salbá un biaha mas. I ora bo aserká pa konfesá bo pikanan kere firme den Su miserikordia ku Hesus ta libra bo di bo kulpa. Kontemplá su sanger deramá ku masha kariño i laga bo keda purifiká pa esei. Asina lo bo keda renasé di nobo. E Pasku di Kristu Hesus no ta un akontesimentu di pasado: dor di e poder di Spiritu Santu e ta semper aktual i ta permití nos mira i toka ku fe karni di Kristu den hopi persona ku ta sufri. Laga e selebrashon di Kuaresma habri nos kurason pa skucha Dios Su yamada pa nos rekonsiliá nos mes ku n’É, fiha mirada di nos kurason den e Misterio paskual i kombertí nos den un diálogo habrí i sinsero ku Señor. Di e manera aki nos por ta lokual Kristu a bisa di su disípulonan: salu di tera i lus di mundu (Mt. 5:13-14).

Bo ta invitá pa akudí na bo parokia i tuma e programa di Kuaresma kaminda tin posibilidat pa partisipá entre otro na retrèt i akto penitensial.

Share This
error: Content is protected !!