KRALENDIJK – Despues ku Fundashon Tene Boneiru Limpi a bira inaktivo, for di instansia nan i personanan ku ta hopi ligá ku medio ambiente i naturalesa a bin na e idea pa kontinuá bou di un mantel nobo ku e tareanan ku e anterior fundashon tabata hasi.

E nòmber nobo di e fundashon lo ta “Fundashon Boneiru Limpi i Bunita”. Nos a forma un direktiva hopi aktivo pa kuminsá konsientisá nos pueblo ku ta kresiendo di e balornan di nos hendenan, nos barionan limpi i bunita, nos medio ambiente i naturalesa. Esaki ta un tarea hopi importante di nos tur.

Notario Kenneth Arends tabata presente kende a guia e parti di firmamentu pa tur kos kana manera mester ta. Onnie Emerenciana a dirigí palabra despues ku tur hende na mesa a firma. El a bisa ku tabata nesesario pa lanta e fundashon pa mantené e isla di Boneiru limpi. “Boneiru mester bira mas lampi den Karibe. Boneiru limpi i bunita ta loke nos tin ku pèrkurá pe,”Emerenciana a menshoná. El a elaborá riba e loke e organisashon ta bai hasi i kon nan ta bai hasi i organisá akshon pa limpiesa. Entre otro pone hopi atenshon na e parti di tiramentu di shushi den mondi.

Seguidamente a papia Diputado James Kroon kende tabata presente pa e okashon. El a menshoná na nòmber di gobièrnu ku e reto di Fundashon Boneiru Limpi i Bunita’ ta hopi nesesario pa komunidat. “Nos ta kontentu ku e fundashon nobo a bira realidat. No warda te dia 15 di sèptèmber, sinembargo kuminsá aktua for di awor pa hasi Boneiru mas limpi. Diferente supermerkado ya no ta hasi uso di saku di plèstik momentu ku hasi kompra loke ta hopi bon inisiativa. Sigur tin mas tarea pa atendé ku e fundashon ta bai yuda kuné,” entre otro diputado Kroon a menshoná. 

Boneiru Limpi i Bunita ta konsistí di personanan ku ta sali na defensa di nos medio ambiente i enkurashá nos komunidat pa hasi i mantené nos Boneiru limpi i bunita.

E aña aki Fundashon Boneiru Limpi i Bunita ta bai enfoká riba e problemátiko di e asina yamá “zwerfafval”, esta shushi plamá riba kaya, shushi gròf den nos barionan i dùmpmentu di shushi den mondi, spesialmente den áreanan di kunuku.

Aki na Boneiru último añanan, nos por a tuma nota ku pa motibu di kresementu rápido di aktividatnan komersial i sosial, kontinuamente bo por mira bòter, bleki , kùp iotro tipodi empake bentá kantu di kaminda i riba terenonan di deporte. Tambe bo por tuma nota ku kasi tur kaminda tin saku di plèstik pegá den mata i kantu di trankera.

Kaminda mas tantu bo por mira e tipo di shushinan aki den forma mas konsentrá, ta;

• Na sitionan kaminda nan ta bende kos di kome i bebe.

• Na aktividatnan públiko.

• Na aktividatnan di konstrukshon.

• Kantu di kaminda.

Debí na e problemátiko ariba menshoná Fundashon Boneiru Limpi i Bunita e aña aki kier kuminsá ku un grandioso akshon di limpiesa konhuntamente ku Selibon N.V., kaminda tur gremio den nos komunidat tambe por partisipá. Asina Fundashon Boneiru Limpi i Bunita kier stimulá nos komunidat pa hasi i mantené primeramente rondó di nan kas i seguidamente Boneiru kompletu limpi i bunita. E akshon di limpiesa aki lo kai den e siman di “Clean up the world” ku ta un akshon di limpiesa ku ta tuma lugá tur aña rónt mundu. E fecha lo tadi 15 di séptémber te ku 21 di séptémber.

E meta primordial di e akshon aki ta pa inspirá i enkurashá persona nan individual i gruponan for di tur skina aki na Boneiru pa tene akshon di limpiesa pa asina konservá nos medio ambiente. Nos kier pa gruponan manera nos skolnan, nos timnan di deporte, komèrsio i nos klupnan di servisio tambe partisipá na e akshon aki. Den kurso di e dianan ku ta bai transkurí lo duna mas informashon tokante di e akshon aki.

Nòmber di e miembronan di Fundashon Boneiru Limpi i Bunita: Onnie Emerenciana – presidente, Claris Trinidad – vice presidente, Gyslaine Coffie – tesorero, Marjolein Oleana – sekretaria, Jenny Coffie – miembro, Ilva De jongh – miembro, David Molina – miembro

Share This
error: Content is protected !!