KRALENDIJK – Ayera atardi a tene un enkuentro ku prensa ku bista di e situashon epidemiólogiko i e último desaroyonan tokante ‘Corona virus’. Diputado Nina den Heyer, Alcira Janga-Jansen i dòkter Izzy Gerstenbluth kende a papia pa medio di konferensia di video. Alcira Janga-Jansen a papia i a menshoná entre otro ku e chèns pa ‘Corona virus’ yega Boneiru ta eksistí. “Na e momentu aki tin chèns ku e vírus por yega Boneiru. Tin diferente kaso di e vírus pafó di China entre otro Hulanda. Nos departamentu salubridat  ta traha ku diferente partner ku ta importante. Nos mester ta prepará si nos haña nos ku un òf mas kaso di ‘Corona virus’. Tin palabrashon ku barkunan si nan tin kualke i formashon relashoná ku kaso sospechoso di ‘Corona virus’. Dòkternan di kas tambe ta regularmente informá relashoná ku e situashon,” Jansen a menshoná.
Despues a papia medio di konferensia di video dòkter Izzy Gerstenbluth. E na su turno a menshoná ku tur hende ta man na kabes relashoná ku ‘Corona virus’. “For di prinsipio mi a bisa ku un vírus ku ta plama pa medio di aire, ta difísil pa evitá ku e no ta plama gran parti di mundu. ‘Corona virus’ ta bai rápido pa medio di nister, tosa i mas. Momentu a detektá e malesa, ya diferente hende a drenta i sali China. Ta hopi importante pa laba man ku regularidat pa prevení  i vírus, esaki sigur si un hende tosa òf nister,” dòkter Izzy Gerstenbluth a menshoná.
Seguidamente diputado Nina den Heyer a papia despues i el a elaborá kon pendiente i prepará nan ta komo gobièrnu. “Nos ta kontinuá ku hopi atenshon pa e ‘Corona virus’.
Brazil tin 1 kaso, Hulanda 2 kaso registrá i Merka 60 kaso. Si un hende sinti ku e tin e vírus e mester bèl su dòkter di kas i no bai na e ofisina di dòkter. Si yega ku registrá un òf mas kaso na Boneiru mester isolá e persona rápido. Tin material pa por atendé ku e vírus na Boneiru,”diputado den Heyer a menshoná.

Share This
error: Content is protected !!