KRALENDIJK – Djaluna 17 di febrüari 2020 ta un fecha históriko den eksistensia di sindikalismo na Boneiru. Pa promé biaha den historia a firma un akuerdo tripartit entre Gobierno di Boneiru, Kámara di Komersio/Asosashon di dunadónan di trabou i USIBO den representashon di e klase trahadó. Ku esaki a kumpli ku un di e metanan mas prinsipal i importante pakiko a lanta e Union Sindikal na Boneiru. Dia a lanta USIBO riba 1 di mei 2012 durante selebrashon di Dia di Labor, kompañero Gerold Bernabela di Fedebon a tira e hanskun pa e diputado di e tempu ei. sra Servilia Janga retando gobièrno pa sinta na mesa ku USIBO pa konsiderá pa yega na un plataforma den kua ta partisipá e tres partnernan pa asina yega na un maneho sosial-ekonómiko ku ta kargá no solamente pa polítika(Konseho Insular), pero ku por konta tambe ku un apoyo i sosten mas amplio den komunidat, Ku esaki USIBO kier a kumpli tambe ku un di e metanan di ILO, International Labour Organisation kende den un resolushon a konkluí ku desaroyo sosial-ekonómiko di un komunidat mester ta kargá pa e tres partnernan pa asina e ta un desaroyo sano i balansá.

Despues ku a reakivá e Dialogo Sentral na novèmber 2019 bou di e asina yama “ Akuerdo di Saliña(Zoutpannenakkoord}” di parti di Konseho di Konsulta di dunadónan di trabou a presentá un dokumento pa partidonan traha riba dje pa yega na un akuerdo di un kuadro di maneho komun kual lo enserá tur e temanan sosial-ekonómiko 2020 pa 2023. Teniendo kuenta ku e akuerdo di gobernashon entre Ulanda i Boneiru, e akuerdo di koalishon UPB/MPB, e programa di gobernashon 2020-2023, konseho di Raad van State, pero tambe kontribushon di diferente temanan sosial/ekonómiko proponé pa USIBO, Gobièrno di Boneiru, Kámara di Komersio i e Konseho di Konsulta di Dunadónan di trabou durante un aña largo partidonan a interkambiá, a dialogá ku otro pa buska konsenso riba e temanan konserní.

Pa a logra esaki tabata nesesario pa banda di e reunionnan formal di Dialogo Sentral, organisá vários enkuentronan bilateral, esta entre USIBO I Dunadónan di Trabou, entre USIBO i Gobièrno di Boneiru, entre Gobièrno i Dunadónan di Trabou, pero tambe reunionnan informal tripartit pa buska e loke tur e tres partidonan tabatin en komun, esta bienestar i prosperidat di e komunidat boneriano. E aktitut , aserkamentu i dedikashon positivo aki a keda koroná ku un akuerdo bou di e nòmber “AKUERDO DI UN KUADRO DI MANEHO KOMUN”, ku a keda firmá djaluna 17 di febrüari 2020 i ku ta kubri e periodo 2020-2023.

Ku e akuerdo aki, partidonan den Diálogo Sentral a fiha nan vishon den e mesun direkshon i por traha huntu riba e base aki pa bai na duna kontenido konkreto na e maneho aki. Tur sindikato a risibí kopia di e dokumentu original firmá pa tur e partidonan i pronto lo tradusí e dokumento na Papiamentu pa asina e por yega den tur skina di Boneiru. USIBO kier a felisitá tur e partnernan ku den un forma sumamente positivo a duna tur di nan banda kargando propio responsabilidat, pero tambe respetando otro su interes- i responsabilidatnan pa por a yega na e akuerdo aki. E dokumento no ta perfekto ni kompleto pero si ela pone un fundeshi sólido pa partnernan por sigui traha na un desaroyo sosial-ekonómiko di nos komunidat den kua BIENESTAR di kada siudadano ta na promé lugá, kaminda tin espasio pa kada ken por desaroyá individualmente uzando su potenshal i talentonan, pero kaminda tambe e prinsipio di solidaridat ta keda praktiká pa yuda esnan mas vulmerabel den nos komunidat hiba un bida desente, kaminda niun mucha ta keda atras i kaminda ta deklará pobresa komo un krimen kontra humanidat i ku mester hasi tur esfuerso pa kombatí esaki i hasi posibel pa ranka pobresa ku rais i tur for di nos komunidat.

Nos bista i esfuerso mester ta fihá pa krea e klima nesesario pa invershonnan por tuma lugá i stimulá kresemento di nos ekonomia, pero alabes perkurá ku tur hende ta toka parti den e desaroyo ei ku derecho riba un trabou desente kontra un pago husto i ku semper den nos mente ku nos fuente prinsipal pa un desaroyo ekonómiko ta sintá den bon uzo i kuido responsabel di nos medio-ambiente.

Share This
error: Content is protected !!