RALENDIJK – Ayera “Bob-Bus Bonaire”a hasi e promé pasada ku miembronan di prensa pa despues kontinuá ku nan tarea pa transportá hende di un sitio pa otro. Orlando Fransisca i Leo Dijkgraaf a papia ku prensa durante e ruta i a splika ku tin un situashon a presentá ku no por kontinuá ku e proyekto. Gobièrnu esnan kende a duna lus bèrdè pa e proyekto a manda un karta fin di siman pasa, i menshoná ku no por aktivá e proyekto. Nan a splika prensa e motibu ku gobièrnu ta referí na dje, no ta kuadra ku realidat. Entre otro nan a splika ku no ta transportá hende manera un taksi òf bus. Simplemente nan ta transportá hende di un hotèl pa algun lugá spesífiko. Ta konsentrá den e mundu di horeka. Nos no ta kompetí ku taksi òf outo bus, nan a menshoná. E proyekto ta kobra 5 dòler pa transportá un persona i mitar di e sèn ta bai pa fundashon di muchanan. A menshoná ku ta bai krea mas kupo di trabou pa nos hendenan riba e isla. Gobièrnu na luna di yanüari a aseptá ku “Bob-Bus Bonaire” ta un bon proyekto i awor a manda un karta i menshoná ku no por kontinuá, Orlando i Leo a menshoná. Algun miembro di prensa huntu ku Kitty Ladiges mènedjer di e proyekto i  Anna Kroodsma kende ta na kabes di e proyekto, a kore e ruta ku e “Bob-Bus Bonaire” ta kore. Tin persona ya a hasi uso di e bus durante e promé pasada ku tabata grátis. Siguiente bia si mester paga e 5 dòler na e lugánan ku ta bend’é. Pa mas informashon por bishita nan pagina di “Facebook”. Kombinashon di potrèt ta duna bista di un parti di e pasada di “Bob-Bus Bonaire” riba su ruta.

Share This
error: Content is protected !!