KRALENDIJK – Resientemente durante aktividat kaminda a duna rekonosementu na deportistanan di aña 2019 di e programa di deporte di Radio Vos di Boneiru 94.7 FM, Adam Littman a dirigí palabra. Erica Mercera e persona kende ta organisá e aktividat pa hopi aña, huntu ku presentadó di e programa radial Wotty Emerenciana, a duna mikrofon na Adam. Promé ku el a papia, Erica a menshoná kon Steve Littman,  kende a bai nos dilanti, tata di Adam, a kontribuí ku hopi amor pa e aktividat, pa trese e deportistanan den lus,el a menshoná. Adam a papia i a bisa:”Mi tata a kere den Erika pasobra ta un persona serio konfiabel. Pa e motibu aki mi komo yu ta kontinuá kontribuí pa e aktividat di deporte ariba menshoná. Erica ta papia bèrdat i ta hende manera e nos mester den komunidat. Rincon di bèrdat ta produsí bon hende. Mi tin bon eksperensia pa motibu ku mi tin un Rinconero den kas, (referiendo na e esposa Jessyca). Pues ta probá. Erika ta fuerte, un persona ku hopi energia hasiendo un tremendo trabou pa e muchanan di Boneiru. El a bisa falta fasilidat pa praktiká tènis i landamentu. Ban wak kon huntu ku gobièrnu por yega na e loke ta hopi nesesario pa e muchanan por práktika e deporte i sigui saka kara di e dushi isla di Boneiru. Tin hopi persona ku bon talento na Boneiru i ta importante pa nos kontribuí pa nan desaroyo. Erica por sigui konta ku nos ayudo. Biba Rincon,”Adam a terminá bisando. Potrèt momentu ku a entrega Adam i su famia presente na e aktividat, pa Steve kende no ta mas huntu ku nos.

Share This
error: Content is protected !!