KRALENDIJK — Último tempu ta hopi papia tokante garantia riba outo di entre 2 pa 5 aña, dependé kua kompania. Un persona outomobilista ta komentá ku mester pone bon atenshon e asuntu di garantia. E ta zona bunita, sinembargo despues por resultá algu totalmente otro for di loke un hende ta pensa òf kere ku e tin garantia pe. Kiko realmente ta referí na garantia? Solamente si ta algu rekonosé pa e fábrika ku tin un fayo den e piesa òf sea e daña den kualke sentido? Djis un ehèmpel un hende ta muha algu elektróniko i e ta daña, sinembargo e mes un piesa por daña sin ku el a muha. E kompania kaminda a kumpra e outo ta drecha esaki? Si  e shòk di e outo a daña den 1 aña pasobra mi a karga por ehèmpel hopi saku di semènt den e pikòp, òf pa kasualidat el a bin ku un debilidat di fábrika, e kompania kaminda a kumpra e pikòp ta drecha esaki pòrnada?

Kon nan ta rekonosé ku algu a daña i e garantia ta paga tur gastu?

Un reportero di Radio Live 99.9 FM a tuma kontakto ku algun agensia di outo na Boneiru pa tende di nan banda kiko realmente ta garantia.

Nan a splika ku tin manera pa rekonosé si e kos a daña, debí ku e hende a hasi algu inkorekto òf ku ta un fayo di e kompania, loke nos ta yama ‘fabrieks fout’. Si ta algu ku ta debí na e fábrika ku el a daña, ta kubri esaki den su totalidat. Kos nan ku tin garantia ta bateria. E garantia tei pasobra e kompania  ta konsiente ku algu por bai inkorekto. Sinembargo no ta sosodé ku regularidat ku tin algu inkorekto. Awendia tin aparato spesial pa detektá un problema na un vehíkulo rápido i esaki ta yega na e agensia madre ku nan tambe ta bai tuma nota dikon e kos a daña. Tin kompania ta kobra pa e trabou, miéntras e piesa si ta grátis. 

Ta importante pa service outo den e temporada di garantia. Por  ehèmpel un bateria hopi bia despues di 6 luna si esaki daña bo mes tin ku kumpra nobo. Si un kompania tuma nota ku ta e persona a hasi algu inkorekto ku e piesa a daña, Tur gastu pa drecha e vehíkulo ta bai riba e doño di e outo. Esaki ta nesesario, sino bo ta haña ku kualke kos sosodé na e outo, e hende ta pidi pa e agensia kaminda el a kumpra e outo drech’é.

Share This
error: Content is protected !!