Desaroyo Ekonomiko Rincon

Desaroyo Ekonomiko Rincon (DER)  ta un grupo di trabou ku ta kai bou di Fundashon Maganzina Di Rei (MdR). E grupo di trabou aki a sali for di un initiativa di Kamara di Komersio (KvK) ku intenshon pa sondia e posibilidatnan i nesesidatnan pa desaroyá un kuna di negoshi (business incubator) pa e sektor di artesenia den Rincon. Ora e grupo a bini huntu nos a yega na e konklushon ku mester di mas oportunidat pa desaroyá ekonomia di Rincon. Asina nos a disidi di lanta e grupo di trabou i pa fasil nos a aloka esaki bou di Fundashon Mangazina Di Rei (MdR) pasobra desaroyo di Rincon ta un di e objetivo di MdR tambe.

DER a ranka sali ku un anochi di informashon dia 16 Januari ultimo kaminda nos a presentá e grupo di trabou, e miembronan di e grupo i kiko ta nos intenshonnan pa ku desaroyo di Rincon. E anochi aki tabata hopi eksitoso ku mas òf menos 50 partisipante. Basikamente nos ta kere ku pa Rincon floresé mester bin desaroyo ekonomiko den i rondo di Rincon. For di e anochi aki a sali ku mester di mas informashon. Nos di DER a bin na e idea pa kuminsa duna oportunidat na e produktornan den Rincon pa presentá nan produkto. Esaki lo ta den forma di un Feria di Produkto (Trade Show, Trade Fair, Handelsbeurs). Ku esaki nos kier kuminsa na promove loke nos tin kaba na produkto i servisio den Rincon.

Di Rincon

Un di e puntonan ku a bin dilanti ta ku DER kier promove e etikèt (Label, Tag) “Di Rincon”. E etikèt aki lo ta manera un etikèt di “Made in Rincon” i lo bini riba produktonan produsí den Rincon. Ku tempu e label aki mester bira apart di ta un indikashon ku e produkto ta di Rincon tambe un garantia di kalidat i bon servisio.  E label aki lo forma parti integral di e marka (Branding) di produktonan di Rincon.

Feria di Produkto

E Feria di Produkto ta pa nos produktornan di Rincon por eksponé nan produktonan. Na prome luga ta pa nos hende nan di Rincon mes sa kiko tur tin na produkto i servisio den Rincon di manera ku nos mes por yuda promove loke tin den Rincon. Pues no ta produktonan so pero tambe pa servisionan ku tin den Rincon.

Nos sa ku den Rincon tin produkto i servisionan manera: Catering; Servisio di Airco; Drechamentu Auto; Hürmentu di Auto; Kuki; Tèrt; Juice; Ice Cream; Li i hopi mas.

E Feria di Produkto ta plania pa dia 5 di April binidero. Mas detaye lo wordu anunsia despues.

Nos ta pidi tur interesadonan pa sigui DER su pagina di Facebook kaminda nos lo saka tur deatayenan di nos aktividatnan pa bo ta na haltura di esakinan. E pagina di Facebook yama ‘Di Rincon’.

Workshop

Pa prepara pa e Feria di Produkto DER ta bai tene un workshop pa duna nos produktornan mas idea kon pa presenta nan produkto. E workshop aki ta dirigí riba tur produktornan ku ta bai partisipa na e Feria di Produkto. Den e workshop lo pone hopi atenshon na presentashon di bo produkto pero tambe na presentashon den e Feria di Produkto. E workshop aki ta plania pa:

Fecha: Djahuebs awor 5 di Mart.

Sitio: Na Mangazina di Rei 

Ora: 7or pa 9or

Entrada: Gratis

Idioma: Papiamentu

Tur interesadonan ta bon bini. Pa mas informashon por tuma kontakto ku:

Evo Cicilia na 786 9191

Danilo Christiaan  na 7011824

Share This
error: Content is protected !!