GERENSIADI BIA: PREPARÁ AEROPUERTO FLAMINGO PA FUTURO

Kralendijk, 06di mart 2020 –Gerensia di Bonaire International Airport (BIA N.V.) ta investigando kon Aeropuerto Flamingo por desaroyá su mes mas mihó pa den futuro tambe keda desplegá e ròl krusial di motor di ekonomia boneriano. Gerensia di BIA a duna NACO, un ofisina ku ta spesialisá den diseñá aeropuerto, e tarea pa aktualisá e plan maestro eksistente, teniendo kuenta ku e Plan Stratégiko pa Turismo, e konsepto di Blue Destination, kresementu di poblashon i e determinashon i ambishon di Kolegio Ehekutivo pa desaroyá ekonomia na un manera sostenibel ku preservashon di naturalesa i kultura.

Alternativa

Den e próksimo lunanan NACO ta eksplorá tres alternativa. Esun promé: Trasladá aeropuerto pa e área pegá ku e toren di kontròl i kazèrne di kuerpo di bombero aktual. Esun di dos: Amplia e aeropuerto eksistente ku un terminal nobo pa tráfiko internashonal. Esun di tres: Mantené e aeropuerto eksistente pa tráfiko interinsular i konstruí un terminal nobo ku plataforma pa tráfiko internashonal so. Na luna di yüli ta presentá e resultadonan na Kolegio Ehekutivo. Mesora despues di verano ta sigui un tanda ekstenso di partisipashon kaminda no solamente ta tende e partidonan ku ta direktamente enbolbí, pero ta bai invitá pueblo i organisashonnan sosial tambe pa durante enkuentronan habrí duna nan opinion i yuda pensa tokante e plannan. Ta e intenshon pa promé ku fin di aña hasi un eskoho definitivo pa un di alternativanan. Despues di esei ta elaborá e plan mas aleu, kaminda ta investigá tambe e aspektonan relashoná ku medio ambiente. Despues di e destaho públiko i ehekushon di e trabou segun ekspektativa den kurso di aña 2026 por tuma e aeropuerto nobo den uso.

Duradero pa futuro

Despues di su entrega na aña 2026 e Aeropuerto Flamingo renobá lo kumpli ku tur eksigensia internashonal ku nos aeropuerto mester kumpli kuné, tantu pa loke ta trata kapasidat, efisiensia, komodidat pa pasahero, siguridat i sostenibilidat. E ora ei nos aeropuerto lo ta prepará pa e kresementu ku nan ta spera di turismo, tráfiko komersial i tambe tráfiko interinsular. Un grupo di guia bou di presidensia di gezaghebber Rijna ta monitoriá henter e proseso. E grupo di guia ta konsistí di entre otro diputado Tjin Asjoe i representantenan di e ministerionan di Infrastruktura i Maneho di Awa i di Asuntunan Interno i Relashonnan den Reino. E grupo di guia aki ta duna konseho na Kolegio Ehekutivo i e ministernan.

Teknologia

Renobashon di Aeropuerto Flamingo ta bai mas leu ku solamente e terminal i e plataformanan, segun e CEO di BIA, Jos Hillen. “Nos ta wak e teknologianan mas nobo pa alsa komodidat di pasahero, por ehèmpel pa medio di minimalisá kareda largu di hende ku ta warda ora di ‘check in’i na imigrashon. Tambe na momentu di elaborashon di e plannan nos ta duna hopi atenshon na sostenibilidat, tantu pa loke ta trata eskoho di material di konstrukshon, komo e aktividatnan diario na aeropuerto. Pa medio di e proseduranan di bulamentu di avion nos ta boga pa redukshon di molèster di sonido. Tambe nos ta investigá ámpliamente eventual efektonan riba nos medio ambiente, pasobra nos no ke kousa daño na naturalesa”. Gerensia a informá Kolegio Ehekutivo den su kalidat di akshonista di BIA N.V. i Kolegio Ehekutivo ta bai di akuerdo ku e atendementu proponé, kaminda mas lat den e aña aki banda di interesadonan ta bai konsultá tambe ku komunidat.

Pa mas informashon: Jos Hillen, tel. (599) 717-5600 ekst. 260 òf (599) 717-5600 ekst. 242

Share This
error: Content is protected !!