KRALENDIJK – Ayera gobièrnu di Boneiru a organisá un enkuentro ku prensa relashoná ku e último desaroyonan pa loke ta trata “Corona virus”. Na e okashon a papia 4 persona. Promé persona ku a dirigí palabra tabata Alcira Janga-Jansen, kende a papia tokante e situashon aktual i e kantidat di persona ku tin e ‘Corona virus’.  

Pa e vírùs yaga Boneiru ta posibel. Ta hopi importante pa tapa boka ora ta nister i tosa na e manera korekto. Si bo a biaha pa paisnan di rísiko haltu, esta ku aya tin hende ku ‘Corona virus’ entre otro China, momentu ku regresá Boneiru i ta sinti e síntoma ku ta trata e ‘Corona  virus’, tuma kontakto ku dòkter,” Alcira a menshoná tambe e la duna e number di telefon ku gobièrnu a pone disponibel ku ta 7772239 pa kualke pregunta ku bo por tin relashoná ku Corona Virus.  
Despues a papia Dr. Giovanni Frans direktor di Fundashon Mariadal i e na su turno a menshoná ku hopi hende ta na altura di e vírùs. “Ta bai yega momentu ku korona vírùs ta presentá na Boneiru. “E vírùs por pasa di un hende pa otro fásil pa medio di tosamentu, nister i man pa man entre otro,”Dr. Frans a bisa. El a sigui elaborá amplio relashoná ku e ‘Corona virus’ i a menshoná ku ta hopi importante pa labaman ku regularidat.

Seguidamente a dirigí palabra Marian Luinstra-Passchier  ku ta ‘Sosiaal Geneeskundige ‘. El a menshoná ku den área tin un laboratorio pa hasi tèst pa detektá si un persona tin ‘Corona virus’ si òf no. “Na hospital tin dos kamber spesial pa atendé ku hende ku e vírùs. Ta importante si un hende sinti malu pa no bai niun kaminda i bèl dòkter di kas. E personal di hospital a haña preparashon kon atendé ku e situashon si e presentá na Boneiru. No tin preparashon spesial pa ‘Corona virus’. Mester ta prepará pa dominá e vírùs pa e no plama rápido. Síntoma ta grip, e persona ku ta kore riesgo grandi ta e persona ku ya tin un enfermedat i haña ‘Corona virus’,”Marian a menshona.  Finalmente a papia diputado Nina den Heyer. El a bisa ku tur siman ta bai reuní i papia ku prensa tokante ‘Corona virus’. El a ilustrá pa medio di un video algun ehèmpel e parti higiena  ku ta importante pa tene kuenta kuné. Pa medio di ‘Facebook’ por haña mas informashon, diputado a bisa e atardi.  

Ta bon pa rekordá tur hende ku tin un hotline pa kualke pregunta relashoná ku Corona Virus ku ta 7772239


Share This
error: Content is protected !!