KRALENDIJK – Djamars anochi lat a tuma lugá un atrako armá riba e transporte di plaka di Divi Flamingo Casino. Dos atrakadó kara tapá a logra bai ku alrededor di 80 mil dòler. E atrakadó a bringa ku un di e bewakernan pa asina por a kita e tas di sèn pa bai kuné. Esaki no tabata fasil, mirando ku e bewakernan tambe a bringa ku e atrakadónan. Un di e bewakernan despues di a bringa ku e atrakadónan aki, a risibí herida di bala for di un arma di kandela na altura di su man. Tantu e atrakadó komo e bewakernan a tira riba otro, esaki riba e lugá di stashoná outo di Divi Flamingo Casino. Informashon adishonal ku Radio Live 99.9FM ta disponé di dje ta ku ayera nochi lat algu promé ku 11’or, e kompania di seguridat ‘SSS’ a presentá na e sitio pa hasi e trabou di buska e tas ku sèn na e casino pa bai deposit’é na banko. Dos bewaker di e kompania a bai paden pa tuma esaki. Despues di a regresá e vehíkulo i momentu ku ya nan tabata sintá den e vehíkulo pa bandoná e sitio, 2 tipo kara tapá i armá a sorprendé nan. A eksigí e bewaker pa entrega e tas ku sèn. E bewaker ku tabatin e sèn a nenga di entreg’é, i a surgi un bringamentu entre nan. Un di e atrakadónan mirando e situashon a tira dirigí riba e bewaker pa por a kita e tas di sèn. E bewaker a risibí bala na su man i a tabata sangra bastante. E tiponan aki a kita e tas i a hui bai for di e sitio mientras e otro bewaker a tira den direkshon di e atrakadónan. Tabatin diferente bala di arma di kandela benta abou na e sitio despues ku esakinan a dal den pilanan na e sitio. E atrakadónan a kore bai pasando riba tereno di Divi Flamingo hotèl, pa despues kibra un parti di un kura di palu i bai for di e sitio. Tin indikashon ku e atrakadónan despues di a sali for di tereno di e hotèl, nan a subi un outo marka “Vitz” kolo skur i bandoná e sitio direkshon sùit. Kantidat di polis i miembronan di e tim di reshèrshi a presentá na e sitio. E kaso ta bou di investigashon.

Share This
error: Content is protected !!