“Le Enfant Terrible”

Nos por a tuma nota den e kolumna ‘piew konsiente’ ku e redaktor en hefe ketu bai ta kaba ku e karakter di Clark Abraham. Den pasado e korant aki a yama Clark Abraham un ‘enfant terrible’. Un título bastante pisá ku ta nifiká un mucha onbeskòp ku no ta tende di su mayornan i no tin rèspèt pa ningun hende.

Clark Abraham, pa ami, ta un hoben ku a siña rèspèt na kas serka su mayornan. Un tata ku su si ta si i su no ta nò. Un tata ku ta eksigí rèspèt unda ku e ta i speshalmente di su yunan i esnan mas serka di dje. Un tata ku ta ferwagt ekselensia di parti di su yunan i ta ekspresá esei tur ora. Un tata ku ora bo hasi algu robes ta esun promé ku ta reklamá. I esei ta Jopie Abraham, punto!!!!

Un mama ku un karakter fuerte ku ta stima su yunan riba tur otro kos. Un mama ku ta skucha hopi pero ku ora e bisa ta basta, ta basta tambe. Un mama ku no ta spaar su yunan ora nan kometé un eror pero ku ta keda konsehá, guia i yuda su yunan pa progresá den bida basá riba nan edukashon di kas i labor di tur dia. I esei ta Anneline, punto!!!

Nos por a tuma nota kon e korant ta trata tur dia di nobo, ora ku e haña un chèns di kometé ‘caracter assasination’ kontra di Clark Abraham.

Un hoben ku e aña aki ta kumpli 40 aña di bida pero ku un talento politiko sin igual den e tempu di aworaki. Un hoben ku ta hinka tur dia su amor i energia den bienestar di su pueblo. Un hoben dediká na polítika i ku desgrasiadamente konosé polítika mihó ku tur esnan ku ta den polítika aktualmente. Desgrasiadamente, pasombra ta parse ku ta esei ta Clark Abraham su desgrasia den su bida.

Clark Abraham sa muchu kos i su nivel ta surpasá e nivel di otronan i den esaki periodismo tambe ta inkluí. Ku Clark tin su propio karaker, esei ta berdat. Clark ta demasiado fanátiko riba su trabou komo politiko i ta purba tur dia di duna ekselensia pa ku esaki, meskos ku su tata a hinka den dje i siñ’é. “Bo mester ta mihó den tur kos mi yu i wak pa bo hasi tur kos perfekto”. Ta esei ta loke ku su tata a hinka den dje. “No faya”!!!.

Anto pa awe bo mester lesa tur dia di nobo ku un korant ta trata na kibra Clark Abraham polítikamente pa un vengansa politiko ku no tin sentido. Esaki ta lástima ku un korant ku supuestamente ta keda konsiderá komo e di 4 poder den nos sistema ta trata di kaba ku un lider politiko ku ta lucha ku su alma i kurpa pa un mihó Boneiru. 

Ami lo sigi sostené Clark Abraham 100% i lo tei den su banda te dia ku ser Supremo bisa: ta basta!!! Dikon? Pasombra mi ta konvensí ku Clark Abraham ta un politiko hoben ku hopi vishon, dediká na su trabou i bienestar di su pueblo. I den esaki mi por papia pa kolega Rolanda Hellburg-Makaai kende igualmente ta sostené Clark 100%. Clark Abraham ta hopi gustá pa su pueblo i otro islanan alrededor pa su forma di ekspreshon i konosementu di polítika.

E ta revolushonario pero ku un kurason hopi humilde meskos ku mi por a lesa i tende ku su abuelo Julio Abraham tabata. 

Mi ta spera ku e korant enkuestion lo por mira e partinan positivo di Clark Abraham i komo medio di komumikashon ku e lesadó ta ferwagt ku mester ta inparsial pa duna notisia ophetivo, un dia lo ‘grow up’ den esaki i laga fanatismo polítiko partidista komo korant un banda i bira mas ophetivo.

Michael J. Pieters

Share This
error: Content is protected !!