Nemensio Beaumont ta konta  eksperensia di kos straño ku a sosodé den kas di su mayornan.

“Na kas di mi mayornan den Rincon, parti sùit e área kaminda awe nan ta yama Sofaya, tabata kaminda mi mayornan a lanta. Un ruman di nos tabata gusta kore paranda i bin kas mardugá. Un di e biahanan ei na momentu ku e tabata biniendo kas kos a sosodé.  

Miéntras e tabata yegando kas mi mama a sinta algu i a bula lanta for di soño i bisa;’Mi yu a kai’ Ami tambe a spièrtá i a puntra mi mama, kiko a sosodé. Mi mama a kana bai na porta di kas i a habri esaki haña mi ruman  na suela i su kara tabata tur skumá. Mi mama tabata sa un bes ku algu malu a sosodé i mester a yama ‘Pa Boshi’ kurioso pa ayudo. ‘Pa Boshi’ tabata un kurioso masha konosí i renombrá pa yuda hende den sustu òf ku ta troumatisa pa alma malu entre otro. Dòkternan di awendia no ta kere den e tipo di kura nan aki. 

‘Pa Boshi’ a atendé mi ruman i despues di poko tratamentu el a resusitá si mi por bisa asina. E tabata den koma. Mi ruman na su turno ora el a bin bei a konta tur loke a sosodé kuné.  

Ora ami tabata yegando kas den e hanchi mi a topa un kos manera un raton di anochi hopi grandi mi dilanti. Kaya tabata sukú i el a bin den mi direkshon anto mi a hala lag’é pasa. Te einan mi ta kòrdá kiko a sosodé. Kon mi a kana yega kas mi no sa. ‘Pa Boshi’ kurioso a bisa nos ku ta un alma malu esei ta i e ta bai for di mundu ku esnan ku e topa. Loke a skapa boso ruman ta pa motibu ku e tabatin alkohòl den su kurpa despues di a dal beter. Ora un hende tin alkohòl, spiritu malu no por move kuné. Ta bon pa tene kuenta i evitá di ta riba kaya despues di 12’or di anochi pasobra kos malu ta sosodé asina grandinan sa bisa.” 

Si abo ta deseá di konta algu straño ku bo a eksperensia bo por tuma kontakto ku Pietersz na number di telefon:7905999.

Share This
error: Content is protected !!