KRALENDIJK – Edison Ellis ta reakshoná riba loke a korant Extra a publiká djaweps 12 di mart. Edison:”Den ámbos elekshon mi a haña mas ku 100 voto i mester a drenta konseho insular e mesun dia ku MPB a gana elekshon. Pa motibu ku e promé bia ku partido a gana nan a tene nos afó mi no a drenta konseho insular. Awor ku nos a bolbe gana mi no por a kontinuá sierto momentu, debí na kondishon di salu. Malesa ta algu ku niun hende por premirá. Malesa ta bin pa nos tur. Danki na Señor ku esnan ku tin bon salú mi ta pidi Dios pa nan keda un ku bon salú. No ta Edison a pidi pa malesa, e a presentá serka mi. Edison a bai den eksterior pa motibu di salu, sino awe tabata otro, esta lo mi no tabata riba e mundu aki. Solamente na 3 okashon mi no a bai reunion di konseho insular debí ku mi tabata den eksterior. Pa e motibu aki mi no tabata na reunion. Mi ta bai tur reunion momentu mi ta stabil i momentu ku mi mester papia mi ta papia. Mi no ta den konseho insular pa buska fama. Momentu mester tuma desishon Edison ta voto sea pro òf kontra na bienestar di e pueblo. No ta e idea pa papia ora largu, kos sin base pa haña atenshon. Tur splikashon nos tur ku ta den konseho insular ta risibí, pues mi no ta komprondé kon diferente otro ta keda puntra loke ya nan a tende. Si mi mester papia mi ta papia sinembargo mi no ta mira motibu pa esei awor. Reunion di konseho insular no ta momentu pa bai hala kakiña buska fama. Ami a bin traha di kurason pa e pueblo. Apesar di mi ousensia mi ta splika pueblo di Boneiru tur momentu, mi ta informá sea presente òf no. Tur kaminda mi ta tende den komunidat, i ta hib’é pa diputadonan, pa nan hasi e  trabou. No ta pa prèt mi no ta presente den reunion, sinembargo pa motibu di operashon. Mi ta gradisí Dios ku mi tin mi salu stabil i ta kontinuá ku mi trabou pa komunidat. Ku tur rèspèt malesa ta bin pa tur hende. Mi no ta deseá pa niun hende haña nan ku problema di salú. Edison no ta kulpa esun ku a skirbi loke a keda publiká den korant Extra. Kisas nan a hasié pa motibu ku nan ta den nesesidat di atenshon. Kada 6 luna mi ta den eksterior pa un kòntròl médiko i tur esnan ku mester ta na altura, sa for di trempan di mi ousensia. Tur informashon ta yega serka Edison apesar ku e ta den eksterior. MPB ta un partido ku ta traha den union. MPB i UPB tin un bon gobernashon i esei ta loke Boneiru meresé,”Edison a konta Radio Live 99.9 FM pa medio di telefon.   

Share This
error: Content is protected !!