KRALENDIJK—Djadumingu mainta trempan, 8 di mart un outo a bòltu koriendo riba kaya Kaminda Lac, serka di “Rancho Allee”. Milagrosamente e vehíkulo a pasa mei mei di 2 palu di lus i bòltu. Informashon no ofisial ku Radio Live 99.9 FM a risibí, e persona a sali ileso for di e aksidente. E markanan di tayer na e sitio ta indiká kon e shofùr a maniobra pasa mei mei di palunan di lus i despues bòltu. El a skapa pasobra no tabata dia ku algu grave mester a sosodé kuné. Milagrosamente el a pasa mei mei di e palunan di lus pa despues bòltu. Di otro banda manera hende ta bisa:”dia no ta bo dia, papel muhá mes ta kòrtabo”. Si e outo a alkansá den e palunan di lus, situashon tabata hopi otro pa e shofùr. Danki Dios e hende a keda bon for di e aksidente i material ta kos ku por yega n’e despues. Potrèt ta ilustrá e palunan di lus ku e outo a pasa mei mei di nan.

Share This
error: Content is protected !!