Na tur saserdote, diákono, religioso i laikonan di Obispado di Willemstad. “Seis isla uni den Kristu” 

Mi rumannan stimá: Ku e úniko meta pa sigurá ku nos ta tuma e medidanan nesesario pa evitá mas tantu posibel di keda afektá pa ku COVID-19, e Korona Vírus, mi ta mira e nesesidat di publiká e siguiente dekreto ku ta drenta na vigor awe 16 di Mart 2020. 

1. Despues di a tuma medidanan di prekoushon ku e karta publiká dia promé di mart 2020 i tambe 

14 di Mart 2020, den kual mi ta menshoná ku si ta nesesario lo bini ku medidanan adishonal na bienestar di un i tur. 2. Despues di a sigui e informenan ofisial emití pa nos Gobièrnunan lokal di kada Isla, i tambe 

tumando na kuenta e importansha di no tin aglomerashon di hende pa asina yuda kontené e vírus aki. 3. Despues di a tuma nota di Obispunan di nos region i di otro paisnan enkuanto e selebrashonnan 

litúrgiko den Iglesia Katóliko. 

Mi ta dekretá ku nos ta posponé tur Selebrashon Litúrgiko, pero tambe aktividatnan di karakter formativo, katisashi, proseshonnan, fiestanan parokial i aktonan religioso públiko te na un próksimo aviso. Nos lo keda selebrá e Sakramentu di enfermonan, tumando na kuenta e medidanan di higiena ku nos tur tin ku atené na dje. Mi ta animá i enkurashá tur nos fielnan pa sigui selebrashonnan di Misa manera ya indiká via di Radio, TV òf Facebook. 

Mi ta bolbe sigurá boso ku e medidanan aki ta pa huntu nos yuda kontené mas ku ta posibel e vírus aki pa su impakto ta mínimo riba boso tur. Boso salú ta di gran importansha no solamente pa evitá Corona vírùs, pero tambe en general. Boso por sigui konta ku mi orashon i ta urgí boso pa nos tur keda ku nos bista fihá riba Hesus nos Salbador i keda uní den orashon den e temporada aki di Kuaresma preparando e solemnidat grandi di Pasku di Resurekshon. 

Boso sirbidó den Hesus i Maria, + Luis A. Secco, SDB Obispu di Willemstad


Share This
error: Content is protected !!