KRALENDIJK – Awe mainta trempan momentu ku solo tabata saliendo na horizonte, a hisa bandera di Aruba i Boneiru na busto di Sr. Gilberto “Betico” Croes (q.e.p.d.), e libertador Arubano. El a biba di: 25-01-1938 pa 26-11-1986.

Na e okashon solamente tabatin 6 persona presente. 4 kende a prepará e parti di hisamentu di bandera i 2 miembro di prensa. Despues ku a hisa bandera miéntras himno di Aruba tabata toka. Sr Walter de Palm presidente di Club di Aruba CASIBARI a papia na e okashon i el a menshoná ku nan ta selebrá awe diferente for di e forma ku ta hasié tur aña di nobo. “E aña aki dia di Aruba ta pasa bou di sirkunstansia hopi diferente loke nos a kustumbrá kuné tur aña. Esaki ta e motibu ku nos a disidí meskos ku nos rumannan na Aruba ku ta tene e seremonia hopi kòrtiku ku un grupo chikitu ku ta hisa bandera di Aruba i Boneiru i baha nan atardi. No ta tuma niun rísiko organisando algu ku hopi hende. E problema ku nos ta biba den, ta algu hopi serio mundialmente. Pues nos a skohe pa selebrá di e forma aki dia di Aruba na Boneiru. Mi ta supliká tur Arubiano na Boneiru, pa nos selebrá e dia reflehando kiko e ta nifiká pa nos, manera ta e kaso tur aña. E Arubianonan biba na Aruba mi ta pidi, kendenan ya ta bibando ku algun pashènt infektá ku e vírùs di ‘Corona’ pa kuida kurpa. Esei ta duna indikashon ku por tin mas hende infektá i ta bon pa tuma tur e prekoushon nesesario, pa evitá ku e vírùs ta sigui plama riba hende na Aruba. Ta importante pa nos na Boneiru sigui kuida mas posibel, limitá ku e vírùs di ‘Corona’ ta sigui plama,” de Palm a menshoná.

Potrèt ta ilustrá e aktividat ku a tuma lugá un momentu kòrtiku.

Share This
error: Content is protected !!