TE KU AWE 18 DI MART BONEIRU NO KONOSÉ NIUN KASO DI COVID-19

KRALENDIJK –Algun momentu pasá  Gezaghèber Reina, Ricard Nicholson, ‘bedrijfsarts’ i dòkter Giovanni Frans di Fundashon Mariadal a papia ku prensa relashoná ku último informashon relashoná ku vírùs di korona. Nicholson ta e persona ku ta bai yuda ku e parti di bosero kolumna blanku di kuido.
Na e okashon Lucia Beck a menshoná ku  no ta bai sinta mas den grupo manera awe pa duna informashon relashoná ku vírùs di korona.

Seguidamente a papia gezaghèber di Boneiru Edison Rijna i promé informashon ku el a duna na prensa tabata ku Boneiru no tin niun kaso di vírùs di korona. “Danki Dios Boneiru ta liber te awor di e vírùs di korona. Medidanan ku ta tuma entrante awor pa dilanti, ta sera tur skol, sitionan pa praktiká deporte, misa i tur otro aktividat ku ta aglomerá mas ku 50 hende. Restorantnan por keda habri, sinembargo mester tene bon kuenta ku e espasio entre 2 hende. Hende ku mester bai èrpòrt ta bon bini, solamente si ta trata hende for di eksterior i ta regresá kas. Turista ku ta na Boneiru ta pone nan den karentena. Tin tèst a tuma lugá ku resultado negativo pa loke ta trata vírùs di korona. For di mayan por yama pa pregunta pa medio di e number di telefon: 08001351. For di 7’or di mainta pa 9’or di anochi por yama. Ta sigui wak e situashon i debí na e resultado ta adaptá e medidanan. Hulanda ta bai yuda ku entre otro sèn i otro nesesidat pa islanan BES. Awor nos ta wak salú di e hende. Nos tin ku yuda nos mes i otronan. Tur hende sigui notisia di medionan rekonosé i no medianan parotin,”gezaghèber Reina a menshoná.
Despues a papia Ricard Nicholson, ‘bedrijfsarts’.
“Djaluna último a tuma lugá un konferensiá di video di islanan di Caribe hulandes ku Hulanda ta dispuesto pa yuda tur kaminda ku nan por.

Prevenshon ta importante, pa no forma grupo di hende, laba man ku habon i sek’é ku papel. Tosa, nister den èlebog. Mishi mas ménos posibel ku man na bo kara. Momentu bo tin vèrkout, keintura, bèl dòkter di kas i no bai serka ofisina di e dòkter. Nan ta atendé bo kaso. E tèst pa por konstatá si un persona tin vírùs di korona na Boneiru, ta kue sanger na Boneiru, mand’é Kòrsou i si ta si, ta mand’é Hulanda pa dòbel chek e tèst,” Nicholson a menshoná.
Dokter Giovanni Frans di Fundashon Mariadal a bisa ku tur kaso ku por posponé pa tratamentu na hospital, meskos ku ta e kaso na Aruba i Kòrsou, ta manda e pashènt kas. Mester prepará nos hendenan den kuido pa nan ta stabil den tur sentido di palabra. Nan konosementu i sosiegu. No ta tur hende ku tin vírùs di korona ta bai interná den hospital. Tin persona ku no ta bira hopi malu i por haña tratamentu na kas. Hende ku ta na estado ku ta bai duna lus, e proseso ta kontinuá normal i seif. Meskos ta e kaso ku esnan ku mester bai den eksterior pa tratamentu médiko,”dòkter Frans a menshoná. A menshoná ku esnan lokal ku ta den eksterior i regresá Boneiru mester keda por lo ménos 2 siman den karentena.



Share This
error: Content is protected !!