KRALENDIJK – Tin manera un ansha pa vírùs di korona yega Boneiru, un suidadano a menshoná. Fin di siman tras di lomba un reportero di Radio Live 99.9 FM a topa algun persona i ta remarkabel ku diferente ta komentá kasi igual. Nan ta bisa ku tin manera un ansha òf deseo pa vírùs di korona ta na Boneiru.

“Boneiru nó mester tin un òf mas kaso di vírùs di korona. No ta un obligashon ku vírùs di korona mester ta na Boneiru. E vírùs por yega Boneiru, danki Dios ainda no tin niun kaso.

Kisas pasobra Kòrsou i Aruba tin algun kaso di e vírùs, esei no ta nifiká ku Boneiru mester tin hende ku tin e vírùs. Nos tin ku gradisí Dios ku aki no tin niun hende kontaminá ku e vírùs. No ta tur parti di mundu tin hopi hende kontaminá manera ta e kaso na China i Italia, djis pa menshoná.  Boneiru tabatin hopi suèltu i danki na Señor ku aki no tin e vírùs. Dios yuda e otronan ku si ta eksperensiá e vírùs. Loke awor nos tin ku pone hopi atenshon awor ta esnan ku regresá Boneiru for di eksterior. E chèns ku nan ta bin kuné ta hopi grandi. Ta rekerí hopi kòntròl, sinembargo e hende ku regresá tambe mester duna di nan banda pa mantené regla pa evitá si nan tin e vírùs, pa plam’é  riba e isla ku tur e konsekuensianan.

Esnan konserní ku ta hasi kòntròl na entre otro aeropuerto ta hasi tur esfuerso. Hendenan ta i por faya, sinembargo te awor e situashon ta bou di kòntròl. Huntu ku gobièrnu nos por mantené i si akaso e vírùs yaga Boneiru, ban spera ku no, pa tene mas será i kura esnan kontaminá. Stòp di keda menshoná ku Boneiru mester tin hende ku e vírùs!”  Esaki tabata loke algun persona a komentá fin di siman, importante ta ku entrante awor no ta risibí niun hende for di eksterior pa por lo ménos 2 siman. Kisas ta fastioso pa sierto hende, sinembargo pa nos tur e ta un bon desishon.

Share This
error: Content is protected !!