KRALENDIJK – No tin mihó aktitut ku den tempu di malestar, turbulensia i krisis ku mantené serenidat i kalmo. Drenta den un diskushon ku no tin direkshon fihá ta oumentá solamente e konfushon. USIBO a skohe pa keda kalmo i analisá e situashon a base di tur e informashonnan tantu lokal komo internashonal ku tabata i te ainda ta drentando. Den seno di Diálogo Sentral a sali un karta pa sr. Raymond Knops enkargá ku asuntunan interno di Reino, den kua a urgié pa konsiderá ku e krisis di Corona no ta hasi distinkshon si bo ta den Ulanda Oropeo o den Ulanda Karibense. Pa tal rason nos ta urgié pa e medidanan ku Ulanda a tuma pa Ulanda, mester konta tambe pa islanan BES. Mester bisa ku den e konteksto aki e gobiernunan di Saba, Statia I Boneiru tambe a manda un karta di e mesun kontenido. Ta opvio ku esaki ta demonstrá un unidat di pensamento i di akshon. USIBO ta lamentá ku nos representashon mas altu aki na Boneiru no a logra forma un bos den e krisis aki pa por a hasi e posishon di Boneiru aun mas fuerte. Un oportunidat mas pèrdí.

Falta ainda tambe ku gobièrno lokal banda di e medidanan di órden públiko, seguridat I salú públiko ku gezaghèber a tuma, bin ku nan pakete di medida ku ta dentro di nan outoridat i responsabilidat pa tuma. Nos lo duna gobièrno e siman aki pa anunsiá nan medida pa asina tin un kordinashon total di medida di gobièrno di reino, gezagheber i e gobièrnu lokal.

Pa mihó komprenshon di e medidanan ku gobièrno di Ulanda a tuma, athuntu nos ta manda un sinòpsis di moda ku tur hende por tuma nota di dje den un forma simpel i analisá pa su mes den kua situashon e ta. Speshalmente nos trahadónan ku ta bibando den un inseguridat ki konekuensia e situashon aki lo tin o lo bai tina pa nan kupo di trabou i kuné seguridat di entrada en e tempu benidero.

1. Pèrdida di entrada.

Un empresario ku tin un pèrdida di benta (minimo 20%) i komo konsekuensia di esei no por mantené hende na trabou, por hasi un petishon na SZW (departamentu di asuntunan social i di labor) e pa un periodo di tres luna haña un kompensashon di salario di 80%. Esei ta nifiká ku pa e e próksimo tres luna e empresario no mester retirá niun trahadó, tampoko esnan riba kontrakt, inkluso e nul-uren kòntrakt. Empresanan ku ta hasi uzo di e areglo aki ta obligá di mantené nan personal na trabou i paga nan nan salario kompleto

2. Sosten ekstra pa e empresarionan ku ta riba nan mes

E areglo aki ta un temporal i tin e mesun karakter ku esun deskribí na punto 1 pa loke ta trata pèrdida di entrada. E ta enserá ku nan lo risibí 80% di e sueldo mìnimo komo kompensashon di pèrdida di entrada.

Trahadónan ku a pèrdè trabou kaba tambe por apelá riba e areglo aki esta 80% di e sueldo mínimo. Ademas dependiendo di e situashon por hasi apelashon riba e ónderstant ekstraordinario pa kubri gastunan nesesario di biba.

3. Lokèt di emergensia

E “regalo” ku a keda menshoná den e karta di 17 di mart di R. Knops na Tweede Kamera pa akapará e promé gólpi ku empresarionan por a sufri lo keda elaborá tambe pa e empresarionan den Caribe.

4. Sosten di likides

E mesun areglonan na Ulanda lo bai konta tambe aki nan.

5. Konsulta ku OLB riba belastennan lokal

Ta bai konsultá ku gobièrnu di Boneiru pa para kobramentu di entre otro belasten di turismo i ópcenten riba vastgoedbelasting.

6. Na unda partikularnan i empresarionan por akudí?

Bankonan por akudí na ministerio di asuntunan ekonómiko

Empresarionan por akudí serka nan finansiadónan

Pa medidanan fiskal por akudí na servisio di belasten di Ulanda Caribense

Pa areglonan sosial por akudí na ofisina di departamento Sosial i di Labor

USIBO ta spera ku tur hende, pero sigur e klase trahadó organisá o nò den un sindikato tuma bon nota di e informashonnan aki i pa esnan ku ta kai bou di nan, hasi bon uzo i no drenta den pániko. Un biaha mas den e tempunan aki kalmo, serenidat, sigui instrukshonan di outoridatnan i kuida kurpa i salú ta e mihó arma kontra e krisis i USIBO ta konvensí ku nos lo sali viktorioso na final.

Share This
error: Content is protected !!