KRALENDIJK –Douglas Abraham e Boneriano bibá aya na Hawaii a papia ku Aimed Ayubi di Radio Live 99.9 FM relashoná ku situashon di vírùs di corona aya na Hawaii, Honolulu. E ta traha den un ‘Emergincy Room’ na Hawaii. Despues ku analisá sierto situashon médiko ta trasladá e pashènt pa e hospital mas grandi di Hawaii, ‘The Queen’s Medical Center. Abraham:“For di yanüari nos a kuminsá eksperensia e vírùs di corona na Hawaii. Awor tin 56 persona infektá. E promé pashènt a aserka nos pa tèst si e tin vírùs di corona. No tin hopi di e aparatonan pa detektá e vírùs na Hawaii,”Abraham a menshona. El a sigui konta  kiko a sosodé i a resultá ku e persona tabatin e vírùs di korona. “E hende no tabata sinti nada di gravedat. Simplente poko grip nada mas. Nos a mand’é hotèl i aya el a kumpli ku loke e mester tene su mes n’e. Aya el a konta nan di su enfermedat i e a keda den un kamber será den e hotèl i a kura. E vírùs ta hopi kontagioso. Ta dura mas o ménos 6 pa 7 dia pa tende resultado si un hende ta infeka si òf no. No tin niun hende ku a fayesé relashoná ku vírùs di corona na Hawaii. Ta hasi kòntròl di e vírùs di corona pafó di e hospital, ya niun persona mester ta paden di e hospital. No solamente hende di edat avansá ta kore riesgo grave. Hende di tur edat por kore riesgo, apesar ku esun di edat ta riba 80 ta den problema serio. Ta parse di dura por lo ménos 1 aña pa por dominá e vírùs.

Mester tene kuenta ku no ta tur hende infekta ku e virus tin síntoma. Medida na Hawaii relashona ku e virus ta entre otro: a para tur aktividat i diferente otro medida pa evitá ku e kos ta sigui plama riba Hawaii. Mester tene kuenta pa e kantidat di hende ku e vírùs no surpasá e kapasidat ku tin pa por atende ku enfermo den hospital pa tur kuido. Hawaii tin mas o ménos 185 mil hende ta biba. E situashon ta bou di kòntròl, sinembargo tin indikashon ku ta bai bira mas serio relashoná ku vírùs di corona loke ta premirá. Ta hopi importante pa tene e distansha di 2 meter, sea ku síntoma òf no. No bai niun aktividat. No pasobra no tin hende ku e vírùs no ta tene kuenta ku e regla. No mester tin miedu, sinembargo mester tuma e asuntu hopi serio. Mi ta finalisá bisando: Mi stima Boneiru i e habitantenan. Kuida kurpa awor mas ku ántes. Ta nos mes por kuida. Loke ta andando ta un komienso i tin mas kos na kaminda,”Abraham a finalisá e kombersashon bisando, for di Hawaii. 

Share This
error: Content is protected !!