KRALENDIJK—Un persona a eksperensia algu i no ta deseá pa su nòmber ta publiká i Radio Live 99.9 FM ta repet’é, mirando ku e loke e persona a pasa den,tabata momentu nan di sustu i nos a haña ta interesante pa kompartí ku abo lesadó. Ta kos ku por sosodé ku abo, apesar ku no ta bo deseo. Ken sa?

E persona a konta ku tempu a kuminsá traha e fundeshi di e edifisio di A.P.N.A., pues hopi aña pasá, tabatin algu straño a sosodé sigur na 2 pa 3 okashon durante di dia kla. Ta trata di e edifisio kaminda awor ta ofisina prinsipal di RCN.”Tabata mèrdia momentu ku tur sobra trahadónan a bai kome i ami tabata sinta sosegá mi kurpa warda 1’or bati p’ami kuminsá traha bèk. Na e momentu aki mi a sinti un holó masha dushi mes di kolonia. Mi a pensa ku tabatin un persona, esta un hende muhé ku tabata pasando, i pa e motibu aki su holó di kolonia a keda tras. Sinembargo no tabata e kaso pasobra mi no a mira niun hende. Den e área no tabatin niun edifisio solamente mondi. E mondi no tabata será, pues tabatin bon bista riba henter e área. Diferente hende a eksperensia ku tin moveshon straño den e edifisio di A.P.N.A.

Mas hende a sinti e holó di kolonia. Un kolega a eksperensia e mes un kos den e mes un temporada ku nos tabata traha, i sin ku mi a papi’é ku niun hende, el a menshoná loke e a eksperensia e tempu aya meskos ku ta tabata den mi kaso.    

Si abo ta deseá di konta algu straño ku bo a eksperensia, por tuma kontakto ku Fittipaldi Pietersz na number di telefon:7905999 òf “What’s App”.

Share This
error: Content is protected !!