Un dama ta konta:”Un djasabra mardugá, mas o ménos 12.30 mi tabata kore e kaya di hanchi Amboina, tambe yama kaya di ‘Pachi’. Mi partner, yu i ami tabata huntu den outo. Nos tabata bayendo kas, ku ta dilanti di e dam, kaminda  a haña e kurpa sin bida algun aña pasa. Mi outo a kuminsá bira pisa i straño. Pero mi no a prekupá  pasobra e ta sosodé na mas okashon. Mi yu sinta patras den outo a bisa, mama tin un kachó mei mei di kaminda. Sinembargo ora nos a wak bon, no tabata un kachó normal. Mas bien parse un hende sunú, ku forma di kurpa straño. Na momento ku mi a yega mas serka, e kos a lanta i den un stap grandi el a krusa bai direkshon e tereno di softball djis pega. Su pia i man tabata hopi largu i straño. Loke a spantami mas ta e manera ku e bestia a drai wak nos. Ku un kara furioso. Manera e ta rabia pasobra nos a wak e. Den mi spantu mi a dera tròt bai. Mi a yega di tende ku e bestia nan ei por persiguíbo i bai bo kas i kousa desgrasia, dependé kon fuerte bo ta. Segun mi ta kore mi a sinti mi kabes a bira hincha. Mi di ku mi partner, lora dilanti misa di playa. Paso mi wela sa kontami ku si bo mira kos malu riba kaya i bo sintibo malu òf outo ta pisa,  Pasa vários biaha dilanti kualke misa. Nan ta kore pa kos di Dios. Dicho hecho. Despues ku mi a hasi esaki, nos a bai kas trankil. Algun luna despues nèt kaminda nos a wak e bestia, un mucha hòmber dominicano a haña aksidente. E kos a ponemi pensa,  Dios sa ku ta e kos ei el a wak.

Buskando informashon ku mi wela ku ta dominikana, e a bisami ta un bruha. Nan ta sali kambia kueru kada sierto tempu. Porta bèrdat loke el a bisami, pasobra si bo pensa bon, si bo krusa bai riba e dam bo ta bai sali nèt dilanti santana. Pues  probablemente  nos a krusa nèt momentu ku e kos a bai kambia kueru òf ya el a hasi esaki. Paso e tabata  sunú. Manera un hende ku a kima pèrdè kueru,” e dama a konta, di loke el a eksperensia.

Share This
error: Content is protected !!