KRALENDIJK – USIBO kier pidi tur trahadó pa pone bon atenshon na e medidanan di ayudo ku a keda anunsiá pa departamentu di Asuntonan Sosial i di Labor. Si bo ta duda den kualkier informashon ku bo a risibí, tende na radio, mira na televishon o lesa den korant, no tuma ningun akshon riba bo mes, sino akudí na e departamentu di SZW, ku ta keda den Playa kaminda e dòkter di seguro ta.

Si bo ta traha na un empresa i e empresa aki por demonstrá ku ela bai atras ku 20% o mas di benta e por bin na remarke pa apelá riba e medidanan di urgensia di ayudo ku ministerio di labor i asuntunan sosial a publiká. E medida ta enserá ku si no tin trabou i pa tal motibo e dunadó di trabou ta mandabo kas, e dunadó di trabou lo risibí un kompensashon di 80% di bo sueldo máksimo di dia. E dunadó di trabou ta obligá di pasa e montante aki pa e trahadó. E 20% sobrá e dunadó di trabou no ta obligá pa duna e trahadó, pero por yega na un akuerdo sea ku e trahadó o kaminda tin sindikato ku e sindikato ku si e ta paga e 20% aki si òf nò. E medida aki ta konta ku forsa retro-aktivo te ku 13 di mart 2020.

Pa loke ta trahadónan ku a pèrdè nan trabou entrante 13 di mart, nos kier rekomendá nan pa bai e departamentu i informá bou di kua areglo bo ta kai. Ta bon tambe pa informá bo sindikato na kua bo ta afiliá. Nos di USIBO en todo kaso ta di opinion ku e retiro ei no ta bálido i ku kisas ela tuma lugá pa motibu di e konfushon ku tabata reina, ya ku e medidanan di parti di ministerio di asuntunan sosial i di labor no tabata konosí e momento ei. Mandamentu di trahadó ku vakashon boluntario o obligatorio na nos opinion tampoko tin sentido, ya ku kedando kas, outomátikamente tambe e dunadó di trabou lo risibí e 80% di kompensashon ku e ta obligá di pasa pa e trahadó.

Trahadónan independiente ku tin eenmanszaak, manera entre otro taksistanan ta bin na remarke pa risibí 80% di e sueldo mínimo komo kompensashon básiko komo konsekuensia di e situashon. Ademas nan tambe por hasi apelashon riba e medidanan adishonal ku gobièrnu di Boneiru ta ofresé. Si tin duda USIBO ta rekomendá pa bai e departamentu di SZW.

USIBO kier trese dilanti tambe ku departamento di asuntunan sosial i di labor lo no trata ni duna pèrmit pa retirá trahadó ku pa motibo di e situashon di e virus di korona e empresario kier retirá. Trahadónan ku ta riba kòntrakt determiná, e dunadó di trabou por keda sin alargá e kòntrakt ora e kòntrakt vense. Un ehèmpel si e trahadó su kòntrakt ta terminá 31 di mart, e dunadó di trabou no ta obligá di alargá esaki despues di 31 di mart 2020. Si e hasié e por apelá riba e medida. No ta pèrmití pa terminá un kòntrakt temporal promé ku e tempu pasa uzando komo argumento virus di korona. Terminashon asina ta ilegal i e trahadó por hiba e dunadó di trabou korte pa eksigí pa e kumpli. Aki tampoko e departamentu di asuntunan sosial i di labor lo no duna koperashon. Otro formanan pa organisá e negoshi den e situashon aki ta posibel den konsulta ku e trahadó(nan) òf kaminda tin sindikato den konsulta ku e sindikato.

USIBO TA HASI UN YAMADA NA TUR TRAHADÓ PA NO FIRMA NADA TANTEN KU BO NO BUSKA INFORMASHON VERÍDIKO SERKA E DEPARTAMENTO O SERKA E SINDIKATO NA KUA BO TA AFILIÁ.

Medidanan adishonal di OLB den e situashon di virus di korona.

Entidat Públiko di Boneiru tambe a anunsiá banda di e medidanan ku gobièrnu ulandes a tuma, medidanan adishonal. Aki tambe USIBO kier hasi un yamada na tur trahadó pa si bo ta duda, bai na e servisio di komunidat i kuido ku ta keda pabou di banko RBC i/o enfrente di ofisina di Registro Sivil buska informashon.

USIBO, pero tambe e organisashon di dunadónan di trabou ta den konsulta estrecho ku otro, mirando e situashon spesífiko ku Boneiru ta aden i mas importante ainda, mirando e impakto serio sosial-ekonómiko ku e situashon aki tin i lo bai tin, pa formulá medidanan adishonal pa en todo kaso garantisá ku tantu e merkado empresarial i esun laboral tin trankilidat, pero tambe pa pensa kon ta bai stimulá e ekonomia su rekuperashon mas lihé posibel ora e kalamidat aki pasa.

Posponemento Kongreso i Dia di Labor

Mirando e ampliashon di medidanan ku gezaghèber a tuma relashoná ku e virus di Korona e desishon no por ta otro ku USIBO tin ku posponé Kongreso planiá pa dia 28 di aprel 2020 i tambe posponé konmemorashon di Dia di Labor promé di mei 2020. Lo anunsiá despues kon lo sigui ku e dos dianan aki mas leu den aña.

USIBO finalmente kier deseá henter pueblo di Boneiru un felis siman, kuida bo salú, sigui estriktamente e instrukshonnan di outoridat pa protehá bo mes i bo próhimo i pa asina huntu den union nos enfrentá e tempunan difisil nos dilanti pero ku e konvikshon ku nos lo sali viktorioso.

Share This
error: Content is protected !!