Nemencio Beaumont ta konta su eksperensia di loke el a pasa den mas ku 60 aña pasa. “Nunka mi a sinti kos manera otro nan ta konta. Loke hende ta bisa nan a mira òf topa spiritu, ami no a yega di mira e kos nan ei. Mi ta un persona kende sèmper a biba na kunuku i den anochi te dia di awe mi ta kana sin miedu i sin topa nada. Nunka ma mira e kos ku nan ta bisa spiritu. Den temporada di Kuaresma nan ta bisa ta e temporada di aña kaminda mas bo ta mira kos straño. Ami ta un bon katóliko i nunka a mira kos manera spiritu.  Mi ta respetá i yuna bièrnèsantu loke pa ami i mi famia ta un dia masha sagrado.

Beaumont ta un persona kende a siña masha hopi mes den bida entre otro traha mentu di kas di bara.

Hopi aña di mi bida mi a pasa den Wasintong Park i konosé e lugá ei den su plant’i man.

Un biaha durante ami i algun persona mas tabata manda kabritu kura na un kas ku nan ta yama kas di sabana a sosodé algu straño. Einan mi tabata biba i traha huntu ku mi tata.

Durante nos tabata manda kabritu un persona di e grupo, Nemencio Winklaar(Q.E.P.D.) a subi riba un seru no muchu haltu pa guia e kabritunan pa kura. Ora nos a haña tur bestia sera den e kura nos a realisá ku Nemencio no a regresá. Mi tata a bisa ban wak unda el a keda kisas algu a pasa kuné.  Hopi ora despues nos a topa kuné i el a konta kiko a sosodé. El a blèndu i bai kana masha leu for di kaminda e tabata. Kasi 5 kilometer leu el a bai sin tabata konsiente di esaki. Ora el a bin bei e mester a kana hopi pa regresá serka su kompañeronan,” Beaumont a konta.  

Si abo ta deseá di konta algu straño ku bo a eksperensia bo por tuma kontakto ku Pietersz na number 7905999 òf Whats App.

Share This
error: Content is protected !!