KRALENDIJK – Situashon di tenshon pa habitantenan di bario Nort Saliña ku mester yega skol amplio Papa Cornes. Awe mainta a presentá un situashon kaminda un trahadó i otro persona mas mester a intervení pa evitá ku 2 kachó ku a ataka un dama na e sitio. E kachónan a presentá riba e dama kreando un sustu pa e dama i esnan ku a yuda mester a hasi uso di harpa i skòp pa a dominá e animalnan. Ta trata di un kas ku e kurá ta kibra parsialmente i ta pone ku e kachónan fásilmente ta sali for di tereno di e kas i ataka hende. Tin mucha ku mester bai skol i ta usa e mes un kaminda pa pasa, ku e señora awe a keda ataka pa 2 kachó. Den e área ta yen di kachó ku ta hasi e situashon peligroso. A tuma kontakto ku polis i nan a bisa nan no ta bai e sitio, debí ku e doñonan di kas no ta na kas, pues niun hende no por atendé ku e bestianan. Suidadanonan di bario Nort Saliña ta pidi pa gobièrnu laga habri un kaya mas na nort ku ta yega na e skol pa evitá ku kachó ta morde hende. E situashon tin di aber ku trahamentu di e kaya nobo ku ta bai na e skol, sinembargo ta tuma poko tempu promé finalisá e kaminda. Pues ta bon pa habri un otro kaminda ku ta yega e skol. E kaya aktual ta hinka hende den sustu pa pasa den área kaminda tin diferente kachó ku por ataka hende.

Share This
error: Content is protected !!