KRALENDIJK—No tin un idea i indikashon kuantu mas e situashon di vírùs di “corona” ta sigui. Tur dia ta bin mas kaso di hende infektá ku e vírùs. Di tur manera ban spera pronto di un òf otro manera sabio nan yega na un solushon pa mundu ta salba di e vírùs. Un suidadano a papia ku un reportero di Radio Live 99.9 FM, si a kaso e problema relashoná ku e vírùs di “corona”dura pa hopi luna sin solushon, kisas ta bon pa nos ta poko prepará. No prepará finansieramente, sinembargo pa nos por sobrebibí. Si vírùs di “corona” no yega Boneiru ta danki na Dios. No nesesariamente e vírùs mester ta na Boneiru pa nos mester ta prekupá. Djis kòrda ku nos ta risibí i dependé di práktikamente tur loke nos ta kome. Loke nos ta bebe referiendo na awa, tambe nos ta dependé for di eksterior. Pasobra nos mester di gasolin òf gasoil pa produsí awe pa hende bebe. Awor nos tin hopi tempu kisas nos por, na promé lugá eksperimentá plantamentu di mata i palu ku ta produsí kos pa kome. No palu i mata ku ta flora bunita. Ta hopi importante loke ya nan tabata purba konvensé e hende pa e por krea su mes hòfi na kas. Awe tin hopi tempu liber kaminda kada famia tata yu i mama por praktik’é huntu. Ken sa si yega asina leu ku importashon di kuminda generalmente baha i e isla mes tin ku kontribuí pa hende kome tur dia? Nos no sa. Tin un palabra ta bisa traha dam warda awe pa tempu di sekura. No ta pòrnada e dicho ta eksisti,” suidadano ta konta. El a finalisá bisando:”siña planta na bo kas nunka ta tempu pèrdí. Sigur hopi mas efisiente ku sinta wak ora nan largu riba telefon ken ta skirbi kos, mayoria kos ku no ta nesesario na e momentu aki.”  

Share This
error: Content is protected !!