Staf di BOPEC organisá.

KRALENDIJK – Djabièrnè último a tuma luga riba insistensia di gerensia di BOPEC un referèndum pa determiná ku berdaderamente e mayoria di e trahadó di staf a afiliá na e sindikato FEDEBON.

Ta asina ku despues di e último akshon na porta di BOPEC, trahdónan di staf di BOPEC a sinti e nesesidat pa nan organisá nan mes den un sindikato mirando tur e inseguridatnan ku tabata i te ainda ta reina na e planta di BOPEC. Dern nan mayoria nan a afiliá na  FEDEBON i manera lei ta preskribí via di mediadó di gobièrno a pidi rekonosimento serka gerensia di BOPEC. Sinembargo gerensia a skohe pa pidi un referèndum pa asina determiná ku en berdat e mayoria di e trahadónan di staf lo ta afilia e sindikato. Di e 44 trahadónan ku tabatin derecho di voto 40 a hasi uzo di esaki. E resultado tabata ku 36 a vota pro FEDEBON, 3 voto a resultá inbálido miéntras ku tabatin un voto kontra FEDEBON. Ku e resultado aki FEDEBON ta e úniko representante di e trahadónan di staf di BOPEC ku lo bai mesa ku e gerensia pa negoshá e kondishonnan laboral di e grupo aki.

USIBO kier felisitá e 36 trahadónan ku a demonstrá kurashi, perseveransha i determinashon pa organisá nan mes. USIBO kier felisitá FEDEBON ku a mira e nesesidat pa duna un man pa sali na defensa di e trahadóan di staf di BOPEC i sigur den un tempu difisil, kompliká i insegur ku e kompania ta pasando aden. USIBO ta spera ku e 8 trahadónan di staf mas pronto ku ta posibel djòin e sindikato, duna nan aporte pa asina ora di negoshá kondishonnan por sirbi interes di tur trahadó di staf.  USIBO ta spera tambe ku lo por tin un bon relashon di trabou entre FEDEBON i BPWU(e sindkatoku ta representá sobrá di e trahadónan di BOPEC). USIBO manera palabrá lo duna sosten i asistensia nesesario pa huntu prepará pero tambe den un diálogo sano i konstruktivo ku gerensia di BOPEC, nos enfrentá e retonan ku tin nos dilanti. Awor mas ku nunka e UNION di trahadónan di BOPEC i nan interes mester ta e guia den e tempunan benidero. Liderato eksitoso bo ta rekonosé kon e ta aktua den tempunan difisil. USIBO ta spera di haña tur koperashon nesesario di tur e aktornan ku por ta di nifikashon pa un bon aseerkamentu di e problematika di BOPEC ku a sirbi interes di e komunidat aki ya pa 45 aña largu, kreando trabou i aportando na ekonomia di nos isla.

Situashon di Krisis’

USIBO a tuma nota kon gobièrnonan a presentá medidanan di urgensia pa konsolidá kuponan di trabou i duna alivio na e sektor empresarial ku mas a karga e konsekuensianan di e corona-virus. USIBO a tuma nota tambe di un konsenso general entre e partnernan ku mester prepará tambe pa e temporada ku lo bin despues ku e krisis aki mengua o hasta disparsé. Aki tambe e enfoke ta kon pa konsolidá kuponan di trabou, pero tambe kon ta pone ku nos ekonomia ta rekuperá for di e sla duru ku ela risibí. Al fin al kabo ta ku un ekonomia ku ta drei i ku ta krese, nos por logra mantené e kuponan di trabou eksistente i hasta krea kuponan nobo. Den e konteksto aki Diálogo Sentral atraves di su visepresidente a bolbe manda un karta pa Den Haag  Den e situashon eksepshonal aki Boneiru lo no por sin un sosten èkstra. Komo isla ku ta dependé di turismo 12”or a bati masha ten. Mas ku nunka nos mester di otro i nos mester traha huntu kontinuamente. Diálogo sentral lo hasi tur loke ta den su alkanse pa hunga un ròl di mara partidonan huntu di akuerdo ku su meta, respetando naturalmente kada ken su responsabilidat. Diálogo Sentral ta konsiderá esaki komo un obligashon pa ku Boneiru i gobièrno di Reinokual ta ekspresá e seriedat i urgensia di e situashon riba término mas largu.

UNION di e klase trahadó.

E krisis aki a siña e klase trahadó un lés, esta kon vulnerabel e ta ora e no ta organisá. USIBO por bisa ku orguyo i satifaskshon ku den e kompanianan kaminda e trahadó ta organisá den un sindikato a atendé e trahadónan ku rèspèt i a konsultá esstrecho ku sindikato pa perkurá ku kosnan ta kana legal I na òrdui ku e derechonan di e trahadó a keda bon kuidá. Sinembargo nos a tende tambe di kompaniannan kaminda e trahadó no por a konta e ku e protekshon aki, ya ku nan no ta afiliá na un sindikato. Spesialmente e trahadónan den sektor di turismo i komèrsio, pero tambe den konstrukshon mester realisá awor mas ku nunka ku nan mester drenta un sindikato. Tempunan ku ta bai bin ta tempunan sumamente difisil i kompliká i ku ta un menasa real pa kuponan di trabou. Awor ta e tempu apropiá, traha un group-chat i papia ku otro pa boso aserká un di e sindikatonan pa boso afiliá. Ta trata di e sindikatonan ABVO, AFBW, FEDEBON, BPWU, NAPB_BES, PWFC I SIMABO. Kada un di nan por splika kon i kiko mester pa bo afiliá. Nos lo por enfrentá e futuro den un forma positivo i konstruktivo si nos prepare nos mes den UNION ku otro.

USIBO TA DESEA HENTER PUEBLO DI BONEIRU UN SIMAN SIGUR I SALUDABEL LAGA NOS SIGUI TE NA ULTIMO MOMENTO TUR INSTRUKSHON PA TENE NOS ISLA LIMPI DI E VIRUS I NOS SALI VIKTORIOSO FOR DI E KONFRONTASHON AKI.

Share This
error: Content is protected !!