Maritsa Silberie ta kompartí un eksperensia kaminda nan a mira un hòmber grandi den Bario Nort di Saliña. Diferente persona a konta nan eksperensia, tokante ku nan a yega di mira e hòmbu grandi den Nort di Saliña, sinembargo tambe den e Bario di Rincon. No sa si ta trata di e mes un hòmber grandi na tur 2 área, sinembargo nan ta parse hopi idéntiko.  

Silberie ta konta

“Tempu ku mi tabata chikitu nos komo nietunan tabata gusta bai sinta na kas di mi wela i welo, Huan i Maria Silberie. Mi tanta Chechi tabata biba ku su yunan serka mi welonan, mi tio Siso tabata biba djis pariba ei i nos a kaba sali for di kas di mi welonan bai biba poko mas na nort. Atardi bai kue anochi nos tur tabata gusta bai bishita mi welanan pa nos sinta huntu i papia ko’i loko dilanti di porta.

Dilanti di nan kas tin un stupi di betòn, i tur hende tabata saka stul for di den kas anto sinta pafó riba stupi. Nos komo mucha nunka tabata gusta sinta kara pabou, pasobra pabou di mi wela su kas tabata skur (e kas pabou di mi welanan no tabata tin hende ta biba aden i e kas blanku banda di dje tampoko) i esei tabata duna nos masha miedu. E kura di mi welanan parti pabou tabata di yatu.

Un dia a toka Manolo i ami su bùrt pa sinta kara pabou riba stupi. Pa kolmo e dia ei koriente a bai. Sintá ta papia, direpente mi a mira un hòmber ta pasa manera den e yatunan, e tabata kana di sùit bai nort. Su pianan tabata mes largu ku e yatunan paso mi no por a mira su pianan, solamente mi por a mira su bachi pretu i e tabatin un sombré riba su kabes. Mi a spanta i no por a bisa nada. Mi bista a keda di lòk riba e hòmber grandi. Sí mi tabata pensa ku Manolo tambe mester a mira e hòmber grandi ei. Direpente koriente a bini i mi por a papia. E promé kos ku a bisa tabata: ‘Manolo abo tambe a mir’e?’ For di e dia ei nunka mas mi a sinta kara pabou riba stupi serka mi welanan,”Silberie a konta. 

Si abo ta deseá di konta algu straño ku bo a eksperensia, por tuma kontakto ku Fittipaldi Pietersz na number di telefon:7905999 òf “What’s App”.

Share This
error: Content is protected !!