KRALENDIJK – Awe un bia mas mi tin e oportunidat di dirigí mi mes na boso ku algun anunsio importante. Esun di mas importante ta, ku te ku 7 di aprel a realisá 26 tèst di kua no tin niun hende ku a tèst positivo pa e vírùs di ‘corona’. E medidanan preventivo ku nos a tuma, kombiná ku komportashon ehemplar di gran mayoria di nos komunidat a aportá ku awe ainda nos ta pará na 0

Awor nos ta drenta den e fase di  buska e vírùs di ‘corona’ di forma aktivo riba nos isla pa wak si realmente e no a yega ainda. Esei ta nifiká ku for di siman pasá riba konseho di RIVM a kuminsá tèst mas hende. P’esei pa medio di esaki ta bai un yamada urgente na personanan ku síntomanan ku ta kuadra ku esunnan di vírùs di ‘corona’ pa tuma kontakto telefóniko ku nan dòkter di kas i e ta evaluá si ta nesesario pa laga tèst e persona aki.

Den e promé fase nos a sera frontera, fortifiká sektor médiko i tuma vários otro medida preventivo  manera sera skolnan i limitá kontakto sosial. Den e fase nobo, nos ke pèrkurá pa si e vírùs ta skondí riba nos isla, diskubrí esaki mas pronto posibel  i isol’é mesora pa evitá ku e ta sigui plama.

Esaki ta pone ku na e momentunan aki nos no por pasa pa suavisá e medidanan preventivo tumá. Segun sektor médiko ta bai dura 2 pa 3 siman pa tèst e grupo ku ta kai den e kategoria di posibel persona infektá ku e vírùs. Ta trata di personanan ku tin síntomanan leve òf pisá ku direkto òf indirekto tabatin kontakto ku turistanan di bishita na nos isla resientemente i persona nan ku ta traha den sektor di kuido.

Despues di e temporada ei si ainda no tin niun kaso di vírùs di ‘corona’ na Boneiru, nos por kuminsá suavisá e medidanan di prevenshon tumá. Si konstatá un òf mas kaso positivo, e intenshon ta pa bai direktamente na un asina yamá ‘lockdown’  adaptá na nos situashon lokal.

P’esei ta importante pa tur hende sigui tene nan mes na e medidanan anunsiá, sigui tene distansia sosial i sigui mantené nan na e reglanan di higiena.  Mi sa ku e medidanan ta pone ku nos tur tin ku hasi sakrifisio grandi i ku nos ta limitá den nos aktividatnan diario. Meta prinsipal ta pa tene tur abitante di nos isla Boneiru seif,”gezaghèber Rijna ta menshoná.  

E ta kontinua bisando: ”un otro trayekto ku a kuminsá kana ta repatriashon di nos residentenan den eksterior.

Tin mas o ménos 250 residente di Boneiru den eksterior ku ta bai regresá Boneiru. Dia 14 di aprel ta trese e promé grupo di residente Boneiru. Tur hende den eksterior ta bai den karentena obligatorio pa 14 dia na nan kas. Kada persona ta haña un asina yamá “buddy” ku ta perkurá pa e persona tin tur loke e mester na kas, i no mester sali su kas. Pues si e mester di kuminda òf kualke otro kos e “buddy” ta pèrkurá pe. Banda di esei ta kontrolá e residentenan  den karentena di forma hopi estrikto i tin konsekuensia drástiko pa esunnan ku no tene nan mes na e reglanan, i por inkluí sanshonnan pisá. E promé grupo ku regresá ta residentenan den funshon vital ku ta bin pa duna sosten den e periodo di krísis.

Despues di esei ta trese kada bia grupo di máksimo 50 persona, riba konseho di RIVM i kada bia e grupo ta bai den karentena obligatorio di dos siman. 

Tantu Gobièrnu di Reino komo Entidat Públiko pa medio di diputado di asuntu ekonómiko i di labor i diputado di asuntu sosial a anunsiá e medidanan pa trese alivio finansiero pa tantu empresa komo personanan ku ta sinti efektonan negativo den e krísis di vírùs di ‘corona’. Den e temporada binidero ta oumentá e informashon tokante e medidanan,  pa komunidat den su totalidat por ta bon na altura, kiko a regla i unda mester ta pa risibí e yudansa nesesario.    

Den mi diskursonan mi a enfatisá e esfuerso grandi ku a hasi den sektor médiko pa reforsá,  preparando pa e momentu ku tin e promé persona ku ta tèst positivo pa COVID-19.  A bini ekspertonan médiko for di Hulanda i Colombia pa yuda na Fundashon Mariadal, i pa transporte di pashèntnan ku ‘ambulance flight’ na momentu ku ta nesesario. 

Solidaridat den e situashon di krísis ta esensial. Nos islanan ruman ta yuda nos momentu ta nesesario i nos ta yuda nan te kaminda por. Asina fin di siman awor un pashènt ku a yega for di Saba a keda hospitalisá pa tratamentu médiko ku no ta disponibel na Saba. Ta bon pa menshoná ku Saba meskos ku Boneiru, ningun persona a tèst positivo pa vírùs di ‘corona’. Awe a yega 2 pashènt for di Saba pa kuido hospitalisá na Boneiru,”gezaghèber Rijna a bisa.

Gezaghèber Rijna a finalisá bisando:”Den fin di siman nos a manda un di e ‘Air ambulance’nan ku tabata stashoná na Boneiru  pa Sint Maarten, pa duna sosten na transporte di emergensia di pashèntnan aya. Na su lugá a bini Boneiru un ‘learjet’ for di Colombia ku por karga 2 pashènt na mes momentu. E tripulantenan di e avion ya tabatin 2 siman den karentena i ta kla pa kuminsá traha.

Nos por a tuma nota den medionan di komunikashon ku yudansa militar for di Hulanda i pa sektor médiko a yega Sint Maarten i ku nos na Boneiru ta bai haña mas yudansa for di Hulanda den e temporada di krísis. Esei sigur ta  nesesario i di aploudí.        

Pronóstiko di ekspertonan internashonal ta indiká ku e pandemia di vírùs di ‘corona’ ta bai dura un temporada largu i lo por dura hopi promé ku tin un vakuna òf medikamentu pa ‘COVID-19’.

Pa awor e úniko kura pa e vírus di ‘corona’ ta bo mes, bo komportashon pa protehá bo mes, bo sernan kerí, bo isla i nos planeta.
Huntu kontra vírùs ‘corona’, ”gezagheber Rijna a terminá bisando.  

Share This
error: Content is protected !!