KRALENDIJK – Djadumingu Pasku di Resurekshon, Pader Alphonsus Baak i algun parokiano,  pa medio di televishon a selebrá Santu Sakrifisio di misa. Algun persona tabata den misa teniendo kuenta ku e distansha sosial durante e selebrashon Eukarístiko. Pader Baak a menshoná na komienso di misa ku awe ta selebrá na un manera diferente Pasku di Resurekshon. “E notisia mester plama. Sinta huntu i kome algu na kas. Nos ta selebrá otro e aña aki, pasobra mester tene bon kuenta ku e asuntu di vírùs di ‘corona’. Bida ta na promé lugá.

Tur parti di mundu ta selebrá Pasku na nan manera,”pader a menshoná. Den Evangelio di awe di Hesu-Kristu segun San Huan. Huan 20,1-9.

“Riba e di promé dia di siman, mainta tempran tabata skur ainda, Maria Magdalena a bai na e graf. El a mira ku e piedra tabata kitá di e graf. El a kore bai serka Simon Pedro i e disípel ku Hesus tabata stima i a bisa nan: “Nan a hòrta kurpa di Señor for di e graf i nos no sa unda nan a pon’E!” Pedro i e otro disípel a sali bai na e graf. Nan dos tabata kore huntu, ma e otro disípel a kore mas rápido ku Pedro i yega promé na e graf. El a baha su kabes weta paden i a mira e pañanan di lino ei, ma e no a drenta. Simon Pedro, ku tabata bini su tras, a yega i a drenta e graf. El a mira e pañanan di lino i e lensu,- ku nan a pone riba Hesus Su kabes -, no tabata huntu ku e otro pañanan di lino, ma e tabata doblá lorá apart na un kantu E ora ei, e otro disípel, ku a yega promé, tambe a drenta e graf. El a mira i a kere. Echo ta ku, te na e momento ei ainda nan no a komprendé e palabranan di Santu Skritura esta, ku Hesus mester a resusitá for di morto.” Pader na final di Santu Sakrifisio di misa a yama danki pa ‘Nos TV’ pa e transmishon pa mundu por wak i skucha e palabra di señor. E selebrashon tabata animá pa duo ‘Pamra’ Tamara i su ruman Pamela, kendenan ta forma parti di Kor Flor di Corormoto.

\
Share This
error: Content is protected !!